Паразіты

Кідь єм у 2013 році зачав співпрацовати з радіом lem.fm з Боґданом Ґамбальом єм ся особно не знав. Ословив ня, ці бы єм робив такый проґрам, де бы єм каждый тыждень дав коментарь. Не знам на основі чого ословив як раз мене. І не знам, ці єм то зробив цілено, або собі то выждала сітуація, но єден з моїх першых, кідь не першый коментарь, быв дость острый. З боку втогдышнього шефредактора Боґдана Ґамбаля не пришла жадна цензура. Зрозумів єм, же в lem.fm можу робити свободну журналістіку.

Кідь ку кінцю рока 2013 Боґдан Ґамбаль оголосив, же кінчіть на позіції шефредактора lem.fm і за нового шефа меновав Даміяна Трохановского, быв то про мене далшый ясный доказ того, же радіо, і днесь уж і інформачный портал, є свободным медійом і не є медійом, котре хтось будовав лем про себе, про свою славу, і котре мусить мати до смерти під контрольов. Быв то доказ того, же радіо і портал суть свободны і незалежны і не стоять на єднім чоловіку, без котрого вшытко пропаде.

Кідь перед двома тыжднями Боґдан Ґамбаль сам одышов із функції ведучого заряду Руской Бурсы і дав простор молодому чоловіку Павлови Малецькому, чім стратив послідню можливость якось контрольовати радіо і портал, кідьже належыме під орґанізацію Руска Бурса, о тім, же як орґанізація, так і медії, котры тота орґанізація выбудовала, суть свободны і незалежны і іде в першім ряді о то, жебы будовати общерусиньскы медії, не о славу єдного чоловіка, уж не може мати нихто похыбности.

За цілый час шефованя Боґдана Ґамбаля в радію і в Рускій Бурсі, єм не быв ниґда цензурованый, нихто мі не говорив, што мам і што не мам писати. Докінця тому так є доднесь. Ниґда мі нич нецензуровав ани Даміян Трохановскый як шеф радіа, ани новый шеф Руской Бурсы. Так само, як мі ниґда нихто з них не говорив што мам, што не мам і як мам писати, і кідь єм за то плаченый як раз Русков Бурсов.

Чом тото вшытко днесь пишу? Покля медіална война знеужывать дякуючі людям як Петро Ґецько уж і Русинів, што нам лем шкодить, председа Світовой рады Русинів на то не реаґує (думам тым головно выдуманый сейм в суботу, котрого были повны медії) і єдине што рішыть на офіціалнім сайті Світового конґреса, то є то, же єм ся осмілив крітіковати конґрес, котрого не мож рушати, бо є досконалостьов сам о собі. Ани то бы ня так не мерзило, кібы далшый член Світовой рады не зачав до того тягати вєдно із председом Дюром Папуґом Боґдана Ґамбаля, кібы у своїх реакціях не писали, же робиме то, што нам повідять тоты, котры нас платять і кібы ся председа Світовой рады не выразив, же сьме паразіты.

При вшыткій почливости, паразіты, о котрых пише, суть членами колектіву lem.fm, котрый днесь творить єдиный общерусиньскый інтернетовый денник і тот денник не пише о тім, яка нам выросла папріґа, як Рутенпрес, а о важных ділах в русиньскім світі. Же собі хтось потребує повісти дашто на Медвідя, то є в порядку, лем не є в порядку, кідь хтось ображать і моїх колеґів, припадно цілый колектів радіа і порталу. Кідь хтось потребує знати, же хто нас платить, то най знать, же нас платить польска держава і не Москава ці Америка. Же сьме свободне медіюм, о тім свідчіть і то, же нераз были на сайті статі, котры были крітічны і в одношіню ку польскым властям.

Паразіты днесь роблять барз важну справу. Творять денник і што іщі важніше, творять общерусиньскый денник. Тым зроблять про єдность народа розділеного в многых державах веце, як ціла Світова рада і кібы ся стрічала кажду неділю. Не знам, ці председа Світовой рады знать што то є паразіт, якбач не знать, але як собі тото думать, то потім радше буду паразітом, як турістом, котрый ся з часу на час урве і іде десь посідіти, все до іншого міста і іншой державы, і думать собі, же так всокотить русиньскый народ.

Lem.fm є незалежне і свободне медіюм і тото є якбач найвекшый проблем. Дакому ся може не любить, же го не мать під контрольов. Лемже треба ся змірити з тым, же нихто з редакції не буде сідіти і чекати на інштруцкії Світовой рады, же коли, о чім і як можеме писати. За тоту свободу єм вдячный вшыткым, котрых єм высше в тексті спомянув.

Петро Медвідь, Пряшів

(Статя была написана як коментарь „Вступне до контроли“ лемківского радіа lem.fm)

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

на фото Русска Бурса в Ґорлицях в 1908 року