Одозва до родичів діти з Пшемкова!

Радийо лем.фм прилучат ся до одозвы, котра явила ся на єдным з фейсбуковых профілів. Тычыт ся она можливости вчыня лемківского языка в єдным з пшемківскых предшколів. Ходит о предшколя но. 1, до котрого до кінця марця треба зложыти внесок до дирекциі той інституциі з просьбом о зорґанізуваня пункту вчыня лемківского языка.

Што важне, старчыт, же буде лем семеро охочых в тій освітовій єдиниці, а подля польскых законів, єй директор має обовязок зорґанізувати пункт вчыня.

Долов взір реченого внеску, котрий можете схоснувати до наступных такых ініциятыв. Тот – авторства пана Томаша Кунціка, публикуєме як перший. Може і Вы пришлете нам наступны того рода інформациі?

Хоц выже вказаний внесок єст адресуваний до директора предшколя но. 1 в Пшемкові, сміло можете го побрати на свій компутер і змінити адресовы даны. Заохочуєме до хоснуваня прав, якы прислугуют Лемкам, понеже сут они ґварантуваны законами польской державы. Старчыт лем семеро учеників (а в меджешкільным збірным пункті – лем троє!), а дирекция освітовой єдиниці єст зобліґувана зорґанізувати пункт вчыня. Кєд мате даякы звіданя, сміло пиште до радия лем.фм на майльовий адрес radio@lem.fm, охочо Вам поможеме!