Русиньскый фестівал у Свіднику уж має свій датум

Датум тогорічного Русиньского фестівалу є вже знамый. Успішна подія з оріґіналным проґрамом буде проходити од 25-го до 31-го мая 2015 р. у Свіднику.

3-тій річник Русиньского фестівалу з моттом „Од Русинів про вшыткых“ принесе мултіжнарову проглядку народностных меншын із міджінароднов участьов. За выникнутьом фестівалу є намаганя представити русиньску културу в цілодержавній діяльности і на европскій уровни. Супроводны події будуть проходити почас цілого тыждня і саме завершіня фестівалу буде вже традічно через вікенд. Култура Русинів буде презентована формов театралных пєс, промітаня філмів, бісід, выступлінь фолклорных ансамблів, якостных музичных, співацькых і танечных колектівів.

Фестівал ся приготовлює про публіку вшыткых віковых катеґорій зо заміряньом на розвиток молодежі і дітей, інформовала у своїй пресовій справі Окресна орґанізація Русиньской оброды во Свіднику, котра є головным орґанізатором Русиньского фестівалу.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА