Сумар дня на 17. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 17. квітня/апріля 2025 р.

Ярослав Королівскій серед найліпшых

World Economic Forum оголосило лавреатів престіжного проґраму Young Global Leaders 2025. Серед выріжненых нашол ся Лемко – Ярослав Королівскій, презес і спілосновател компаніі Synerise, властитель і презес клюбу Wisła Kraków, a тіж выкладовця Науково-Технічного Університету в Кракові. Проґрам Young Global Leaders, веденый через World Economic Forum, віріжнят особы, якы не скінчыли 39 років, і якы своім діяньом мают непересічне влияня на світ в обшырях, в котрых роблят – од бізнесу і політикы по науку і технолоґіі. Каждого рока выбераных є близко 100 осіб спосеред тисячів номінуваных. Званя Young Global Leader узнаване є за єдно з найважнійшых і найбарже престіжніх выріжнінь, якє мож отримати на світі перед сороківком, заєдно в світі бізнесу, як і наукы і політикы. Ярослав Королівскій то єдина особа з Польщы, яка нашла ся серед нагородженых в тым році. Ґратулюєме!

1,5 % податку для Стоваришыня Лемків

Кєд сте ся іщы не розрахували з податків то можете сміло спомочы своім 1,5% Стоваришыня Лемків. Тота наша лемківска орґанізация оголосила, што мож оддати як раз 1,5 % податку на статутовы ціли, якы повязаны сут головно з плеканьом і розвитком лемківского языка і культуры. Стоваришыня Лемків было основане в 1989 р. То перша повыселенча лемківска орґанізация, яка одраз зосередила ся на головных достоменностьовых цілях. 1,5% мож задеклярувати вписуючы номер KRS 0000270261 і дописуючы в рубриці Cel szczegółowy: Stowarzyszenie Łemków 29413.

Поломничество копальників на Святу Гору Грабарку

Як інформує православна парохія Святой Тройці в Любіні, мож ся уж записувати до участи в першым поломництві копальників на Святу Гору Ґрабарку. Поломництво нижньошлезскых копальників обуде ся аж в серпни/авґусті – на праздник Преображыня Господнього, з благословліня владыкы Юрия, архієпископа вроцлавско-щеціньской єпархіі Польской Автокефальной Православной Церкви. Владыка Юрий призначыл капеляна для копальників, якым єст о. прот. Богдан Репела, любіньскій парох. Поломничество своім патронатом обняла компанія KGHM. Детальный його проґрам найдете на сайті любіньской парохіі.

В Пряшові будуют войсковый шпыталь

В Пряшові будуют новый войсковый шпыталь. Працы ідут подля грамоноґраму. В минулый понедільок на будову зашол премєр Словацкой Республикы, Роберт Фіцо, якій запознал ся з дальшыма етапами робіт. Покля іде о гармоноґрам прац, оптимістичный вариянт подля Фіца бесідує, же до кінця 2026 р. бы мала быти зроблена сурова конструкция. 2027 рік, як дальше повіл премєр, был рішеный на працы в середині обєкту.

Христос Воскрес!

A на конец з нагоды ближучого ся праздника праздників – вшыткым любителям нашых медий, зосередженых при Медияльній Ґрупі ЛЕМ.фм+ – хочеме желати пережыти тот великодній час з радістю, теплом і надійом на іщы ліпше будуче. Желаме Вам Спокійных Свят, а з нима смачной паскы і кобаскы, острого хріну, яєц, а предовшыткым глубокой віры в дане Воскресшым Христом вічне жытя. Того желат редакция ЛЕМ.фм і члены Стоваришыня «Руска Бурса» в Ґорлицях.