Бесіды Сільвіі Бруні з Лемками #5 – о. Григорий Пацан

В пятницю 18. квітня/апріля тр. о год. 9:15 просиме слухати бесіду з о. Григорийом Пацаном. Інтервю зробила Сільвія Бруні, польска Італиянка (або італияньска Полька), котра – захоплена Лемковином – рішыла як найліпше єй познати.

О. Григорий Пацан – вродил ся в 1982 р. в Прушкові. Скінчыл студиі на Выділі Цивільного Будівництва Варшавской Політехнікы на напрямі Будівництво. В 2013 р. вступил до Грекокатолицкой Митрополитальной Семінариі в Люблині, котру скінчыл в 2019 р. Рукоположеный Його Высокопреосвященством о. Архієпископом Євгенійом Поповичом. Вчас студиюваня і семінарийной формациі взял участ в студентскій выміні в рамках проґраму Еразмус, одбываючы в роках 2016-2018 формацию в Грекокатолицкій Духовній Семінариі ім. Павла Петра Ґойдича та теолоґічны студиі на Выділі Грекокатолицкой Теолоґіі на Університеті в Пряшові.

Священьскє рукоположыння одбыло ся в грекокатолицкій церкви Святых Петра і Павла в Креници. В роках 2019-2022 служыл вікарийом в парафіях в Гломчы, Саноку та Устриках Нижніх. Од 2022 р. служыт парохіяльным настоятельом в парохіях в Розділю, Полянах, Вільхівци та в Зындрановій. Мешкат в Ґорлицях.

«Лемківскы Оповісти: Мультікультурова Подорож через Сучасніст». То мультімедияльный проєкт, реализуваный в 2024 році, котрого цілю было приближыти культуру, історию і сучасне жытя Лемків. В рамках сериі возникло 10 авдийоподкастів, в котрых мож почути бесіды з поетами, активістами, професорами, тлумачами, молодым поколіньом Лемків.

За проєкт одповідала Сільвія Бруні, вроджена в Італиі теоретичка музикы, яка од 15 років мешкат в Польщы, а перед парома роками залюбила ся в лемківскій культурі. Єй стараньом была печатана перша антолоґія лемківской поезиі в тлумачыню на італияньскій язык. Подкасты доступны сут в польскым языку, товаришыт ім інтерактивна мапа на сайті siliva.lem.fm.