Бесіды Сільвіі Бруні з Лемками #4 – проф. Олена Дуць-Файфер

В четвер 17. квітня/апріля тр. о год. 9:15 просиме слухати бесіду з проф. Оленом Дуць-Файфер. Інтервю зробила Сільвія Бруні, польска Італиянка (або італияньска Полька), котра – захоплена Лемковином – рішыла як найліпше єй познати.

Олена Дуць-Файфер, др габ., проф. ЯУ – лемківска бадачка і ревітализаторка лемківскых культуры і языка, літературознавчыня, лемкознавчыня, історичка штукы, редакторка, поетка; кєрівничка Катедры Росийского Літературознавства в Інституті Східньославяньской Філолоґіі Ягайлоньского Університету; основателька і ведуча специяльности росийска філолоґія з русиньско-лемківскым языком на Педаґоґічным Університеті в Кракові (2001-2017); секретар Східньоевропейской Комісиі ПАЗ; в роках 2005-2015 репрезентантка Лемків в Спільній Комісиі Уряду та Нацийональных і Етнічных Меншын; членкыня Проґрамовой Рады Інституту Языковой Ріжнорідности Польской Республикы при Міністерстві Культуры.

Науковы заінтересуваня то: література а етнічніст, література етнічных меншын, меншыновы дискурсы, меджекультуровы реляциі, антрополоґія літературы, ревітализация загыбаючых языків і культур.

Авторка многых науковых публикаций, в тым моноґрафіі Лемківска література в другій половині ХІХ і на початку ХХ ст. (2001), анґлоязычна версия: Treading Paths. Lemko Literature in the Years 1848–1918 (2023), Медже буквом а літером. Сучасна література білоруской, украіньской і лемківской меншын в Польщы (2012). Опрацувала Антолоґію повыселенчой лемківской літературы (2002); єст спілредакторком Бесідуйме по лемківскы (2007), редакторком Контекстуального словника лемківского языка (2019-2024). В 2005 р. основала і до тепер редаґує лемкознавчый науковый часопис «Річник Руской Бурсы».

Як спадкоємчыня лемківской повыселенчой травмы, фурт старат ся привертати лемківскій спільнті і лемківскій культурі гідне трактуваня і протидіяти єй заниканю, «карліню». За тоты діяня отримала чысленны нагороды од державных орґанів, м.ін. Одзнаку Міністра Культуры Польской Республикы – Заслуженый Діяч Культуры (2004), Медаль Комісиі Нацийональной Едукациі наданый Міністром Нацийональной Едукациі (2016), Золотый Крест Заслугы, наданый Президентом Польской Республикы (2021), а тіж нагороды од лемківско-русиньской соспільности – серед них: Почестне звання «Лемка Рока 1988», Премію Кірила і Методія за розвиток русиньского языка признану Світовым Конґресом Русинів (2007), Премію Александра Духновича в обшыри русиньской літературы за 2009 рік, Премію ім. А. Годинкы признану Вседержавным Обществом Русиньской Інтеліґенциі ім. А. Годинкы (2020).

«Лемківскы Оповісти: Мультікультурова Подорож через Сучасніст». То мультімедияльный проєкт, реализуваный в 2024 році, котрого цілю было приближыти культуру, історию і сучасне жытя Лемків. В рамках сериі возникло 10 авдийоподкастів, в котрых мож почути бесіды з поетами, активістами, професорами, тлумачами, молодым поколіньом Лемків.

За проєкт одповідала Сільвія Бруні, вроджена в Італиі теоретичка музикы, яка од 15 років мешкат в Польщы, а перед парома роками залюбила ся в лемківскій культурі. Єй стараньом была печатана перша антолоґія лемківской поезиі в тлумачыню на італияньскій язык. Подкасты доступны сут в польскым языку, товаришыт ім інтерактивна мапа на сайті siliva.lem.fm.