Сумар дня на 15. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 15. квітня/апріля 2025 р.

Сбиново разом з Ужгородом реалізуют трансграничный проєкт «Heritage3D»

Аґентура ТАСР поінформувала, што місто Ужгород при спілпрацы з Сабиновом реализує трансграничный проєкт «Heritage3D», котрый заміряный єст на діґітализацию семох культурово-історичных обєктів. Цілю проєкту єст звекшыти свідоміст люди та піднести туристичну вартіст обєктів. В Сабинові окрем історичного центра, градных мурів і веж ци дзвінниці, будут предметом дігітализациі і сакральны обєкты: євангелицкій і два римокатолицкы костелы, а в Ужгороді – замок. Діґітализация буде ведена модерном, неінвазийном методом збераня даных. Результаты будут удоступнены в цифровій формі як модель 3D. Проєкт буде реализуваный через 12 місяців і його кошт то понад 330 тис. евро, з чого більше як 299 тис. евро то дофінансуваня з проґраму Interreg NEXT HUSKROUA, што піперат трансграничну спілпрацу медже Мадярами, Словацийом, Румунійом і Украіном.

Сут результаты проґраму ЕтноПольща 2025

11. квітня/апріля оголосили результаты проґраму ЕтноПольща орґанізуваного Нацийональным Центром Культуры. Реализуваный єст од 2018 р., а його цілю єст підтримувати локальны і культуровы достоменности та творити можливости до участи в культуральным жытю так на селі, як і в місті. До тогорічной едициі проґраму зголошено понад 2000 внесків, з чого 244 отримали дофінансуваня. Серед выріжненых нашли ся внескы м.ін. Ґорлицкого Центра Культуры на дополніня облечыня ансамблю Погіряны, Ґмінного Осередка Культуры в Ґорлицях на реализацию шторічной подіі «Малопольскы вінкы» ци Стоваришыня Lemko Tower на проведіня варштатів Лемківской Культуры «Карпатскы Корені». В Бобовій в рамках дофінансуавня зреализуют подію Бобівскы стрічы з Фольклором Погранича, а в Мшані дальшу едуцию проєкту «Оповіст о двокультуровій довоєнній Мшані Нижній». На жаль, многє чысло проєктів присвяченых лемківскій культурі не отримало дофінансуваня.

Варштаты хоснуваня дикых рослин

Карпатскій Народный Університет просит до участи в варштатах хоснуваня рослин, што дико роснут. В часі пятьох вікендовых стріч участникы будут мочы навчыти ся, як зберати зіля, розпознавати рослины, варити з них стравы, та будут мати нагоду познати основы етноботанікы і зілярства. Кошт варштатів то 100 зл, а записати мож ся через інтернетовый аркуш доступный на фейсбуковым сайті Карпатского Народного Університету.

Театральный Майовый Вікенд в Низкым Бескіді

Стоваришыня ім. Мирка Нагача «Білый сокіл» та Меджепоколіньова Tеатральна Ґрупа Племя просят на Театральный Майовый Вікенд. Уж тепер інформуєме, што каждый, хто іщы не виділ спектаклю «Бомбель», зрыхтуваного на основі оповіданя Мирка Нагача, буде мал таку нагоду в майовый вікенд. Як і перше, сценом для акторів з ґрупы Племя буде колиба на обшыри Лемківской Ватры в Ждыни. Спектакль буде презентуваный 2. і 3. мая. о 21.00 год. Вступне – 35 зл, обовязує резервация місця через інтернетовый аркуш на фейсбуковым сайті Театральной Ґрупы Племя. Припоминаме, што «Бомбель» перезначеный єст лем для дорослых обзерачів.