Сумар дня на 3. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 3. квітня/апріля 2025 р.

Ремонт будинку Руской Бурсы в Ґорлицях

По долгых роках, час на модернізацию будинку Руской Бурсы в Ґорлицях. Стоваришыня «Руска Бурса» в Ґорлицях остало бенефіциєнтом проґраму Міністра Культуры і Нацийональной Спадковины пн. «Інфраструктура Культуры 2025». Завдякы фінансовій підпорі історична будівля ґорлицкой бурсы буде могла перейти І етап ремонту, в рамках котрого будут зроблены отепліня поду і зовнішня елевация. Стоваришыня «Руска Бурса» в Ґорлицях диспонує передвоєнныма плянами модернізациі будинку. Заміром є, жебы зреализувати пляны довоєнных бурсаків.

Варштаты малюваня яєц в Рускій Бурсі в Ґорлицях

В Рускій Бурсі в Ґорлицях, як што рока, одбудут ся вашршаты малюваня яєц. Традицийні все стрічаме ся в Квітну Неділю, яка того рока выпадат 13. квітня/апріля. Варштаты зачнут ся о 15.00 год. Орґанізаторы забезпечают материялы – будут на Вас чекати: зварены яйця, фарбы і воск до малюваня. Вчас спільной стрічы продолжана буде традиция рыхтуваня великодніх писанок батіковом методом – розтопленый віск наносит ся на верхню верству яйця, хоснуючы метальовый писалец з головком. Вступне очывидно дармо. Красні просиме!

Петиция – протест – проти вежы на Горі Явір

Фурт заохочаме Вас підписати петицию – протест в справі побудуваня на Святій Горі Явір видоковой вежы. Петиция цілый час єст доступна в Інтернеті. Припоминаме, што окрем того обєкту, має гын быти зроблена і пленерова експозиция посвячена барскым конфедератам. Здає ся, же в демократичній державі голос соспільства повинен мати дакє значыня. З інформаций, якы дотерли до нашой редакциі, выходит, што одбыли ся уж консультациі. Любителі горы Явір апелют о пошануваня для культуровой спадковины того місця. Апелюют і о тото, штобы была дальше захована традиция і духовіст горы, без додатковых річы, якы на силу здают ся вводити дециденты. На сайті petycjeonline.com мож підписати петицию в тій справі. Мотузок до ней найдете і на нашым портали.

Евпройскы фонды на Словациі

Мiнiстeрство Інвeстиций, Реґіонального Розвитку і Інформатизациі СР і Пряшівскій Самосправный Край подтвердили замір упростити і приспішыти хоснуваня европейскых фондів на Словациі. Ведучы ресорту і краю на спільній стрічы, яка прошла 31. марця, окрем інчого одкрыли звіданя актуального стану імплементаций проєктів в рамках механізму інтеґруваных територияльных інвестиций за ПСК. Результатом стрічы было тіж меморандум о спілпрацы при розвитку водного обєкту Домаша, а тіж штырьох проєктовых договорів, котры ся дотуляют активности в Попраді та модернізациі шкіл в Голчіковцях, Подолинці і в Бардийові.