Сумар дня на 4. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 4. квітня/апріля 2025 р.

PKP ремонтує желізничны стациі в Долині Попраду. Торы вылучены з хоснуваня

Парунадцет желізничных пристанків в Долині Попраду буде выремонтуваных через PKP Польскы Желізничны Леніі. Інвестиция на желізничній леніі нр 96 Тарнів – Лелюхів рушыла в минулым місяци. Єй кошт то близко 191 млн злотых. Траса тота, популярно звана «креничанком», лучыт ся з ленійом нр 105 Мушына – Крениця. Працы выконуваны на одтинку од Нового Санча до Крениці мают злегшыти рух потягів і піднести комфорт подорожы. Працы вымагают вылучыня торів з хоснуваня аж до 11. червця/юнія. До того часу буде діяла заступча автобусова комунікация. В рамках інвестициі выремонтуваных буде 12 стаций і пристанків, м.ін. Старый Санч, Рытро, Андриівка, Мушына, Верхомля Велика, Зубрик, Жеґєстів і Милик. Пероны будут перебудуваны, жебы зліпшыти доступ для вшыткых подорожуючых. Окрем того на одтинку Старый Санч – границя державы выремонтуваны будут торы і 23 желізнично-дороговы переізды та 60 інжынєрийных обєктів, в тым желізничыный міст в Мушыні над ріком Попрад. Явит ся і нове ґратя до переіздовой сиґнализациі. Працы обоймут тіж тракцийну сіт медже Старым Санчом і Пивничном. В результаті прац мают быти выелімінуваны ограничыня руху і піднесена скоріст потягів, при єдночасным звекшыню рівня безпекы і комфорту ізды. В червци/юнію мают ся завершыти основны працы, што позволит взновити рух потягів. До кінця того рока мали бы быти ведены кінцьовы працы вколо торів.

Дорога зо Ждыні до Радоцины заперта для руху

Надлісництво Ґорлиці інформує, што з причыны плянуваного ремонту дорога зо Ждыні до Радоцины буде заперта для руху пішых, біциґлів і авт. Альтернативный доізд до Радоцины веде через місцевости: Чарне-Крива-Маластів або Чарне-Крива-Ґладышів. Дорога буде закрыта од четверга 10. квітня/апріля до кінця липця/юлия тр.

Тырват акция вакцинациі лишок

Вчера на Підкарпатю рушыла весняна акция вакцинациі лишок. До 13. квітня/апріля в лісах буде зошмаряна вакцина для лишок проти встеклині. Має она форму бронзового диску або кубика, з притігаючым звірята запахом. Треба памятати, же кєд найдеме таку вакцину, не мож єй дотыкати. В часі тырваня акциі вакцинациі лишок і через 14 дни по єй завершыню, тє. до 27. квітня/апріля вкючно, не мож выпущати без опікы псів і котів, а в часі прогульок псы мусят быти на мотузку і в наморднику. Цілю успішного і безпечного проведіня вакцинациі лікарі просят жытелів о достосуваня ся до рекомендаций, а родичів і опікунів о переданя тых інформаций дітям.

15. Лемківско-Погіряньскій Великодній Ярмак

Уж в тоту неділю 6. квітня/апріля одбуде ся 15. Лемківско-Погіряньскій Великодній Ярмак, на якій просит Мазярска Загорода в Лоси. Подія зачне ся о 11.00 год. Окрем клясичной ярмачной части в проґрамі подіі находят ся додатковы активности – розмаіты великодні варштаты, выстава, турнір толчыня яєц, конкурс збераня яєчок для діти і інчы. Як все буде мож попрібувати локальну кухню, зрыхтувану Кружком Сельскых Ґаздынь в Лоси. О 15.00 год. в місцевий церкви пройде великодній концерт, на котрым запрезентуют ся хор Cantores Carvatiani та Співочо-Інструментального Ансамблю Основной Школы в Лоси. Вступне платне 2 зл.