Лісникы і консерваторы спільныма силами в охороні культурной спадковины

Спілпраца лісників зо службами консервациі памятників Підкарпатского Воєвідства має долгу традицию. В віторок 1. квітня/апріля 2025 р. была сформализувана порозумліньом підписаным через Марияна Піґана, директора Реґіональной Дирекциі Державных Лісів в Коросні і Адама Сапету, Підкарпатского Воєвідского Консерватора Памятників. Порозумліня підписано в сідибі Надлісництва Рыманів, в 200-літнім дворі Потоцкых.

В стрічы взяли участ шефове делеґатур Консерваторского Уряду: Бартош Подубный (Ряшів), Лукаш Дзік (Коросно), Славомир Стемпак (Тарнобжеґ) та специялисты з обшыри археолоґіі і документациі памятників, та Павел Панась, надлісничый Надлісництва Рыманів і Едвард Маршалек, Войцєх ЗіМный і Павел Ростек – робітникы Реґіональной Дирекциі Державных Лісів (РДДЛ) в Коросні, звязаны з охороном культурной спадковины.

«Наша орґанізация в уставовых задачах має предовшыткым дбаліст о захованя природничых ресурсів, але маме свідоміст, же в лісах находит ся многіст археолоґічных елементів, памяток, свідоцтв істориі і культуры, часто безцінных з пункту пізріня істориків, аргеолоґів ци консерваторскых урядів. Зато хочеме штораз ліпше дбати тіж о тоту част нашой культурной спадковины» – деклярувал в своім выступліню директор Піґан.

Адам Сапета, Підкарпатскій Воєвідскій Консерватор Памятників, запрезентувал обшыри заінтересуваня консерваторского уряду такыма лісовыма обєктами, як напр. терен руін Монастыря (Надлісництво Любачів), обшыр неістнуючого села Хоцєнь (Надлісництво Балигород) ци руіны замку Собєнь ((Надлісництво Ліско), як пріоритетовы в будучій спілпрацы.

Едвард Маршалок рамово представил ріжнорідніст памятковых обєктів, якы находят ся в лісах, то м.ін. церквиска, пропамятны таблиці, цмонтері, курганы, місця памяти, памятникы вписаны до реґістру памятників, місця звязаны з історийом реґіону, памятковы паркы. Вшыткого разом зінвентаризуваного є 599 того типу обєктів, а список єст фурт дополняный.

На конец надлісничый Панась представил історию двору Потоцкых в Рыманові і повоєнну реновацию обєкту – тепер находит ся в реґістрі памятників. Поінформувал тіж о новых арехолоґічных становисках в рыманівскых лісах.

Фіналом было підписаня порозумліня, котре закладат спілпрацу медже сторонами тіж на поли популяризуваня знаня о культурній спадковині та вырпацуваня метод охороны археолоґічных памятників з увзглядніньом можливости ведіня лісовой господаркы. Стороны будут тіж спілпрацувати над розпознаньом чысла і розміщыня памятників, якы находят ся в лісах, котры сут надзоруваны через РДДЛ в Коросні. В плянах будут тіж спільны проєкты і діяня едукацийного характеру.