Антоний Крог Почестным Амбасадором Сандецкого Штетля

Антоний Крог, щырый приятель Лемків, отримал званя почестного Амбасадора Сандецкого Штетля. То соспільна орґанізация, яка веде діяня в обшыри плеканя історичной памяти о меншынах прожываючых на Сандеччыні.

«Мы абсолютно горды, што нашу номінацию принял Антоний Крог, выдатный писменник, етноґраф, історик культуры, пиблициста, тлумач і куратор вельох выстав» – написал Сандецкій Штетль.

Званя Почестного Амбасадора єст признаване особам та інституциям, якы заанґажуваны сут в меджереліґійный діалоґ, плеканя традиций і вельокультуровости на Сандччыні. Сам Сандецкій Штетль то соспільна орґанізация, якой головным цілю єст приближаня культуры, реліґіі і істориі сандецкых Жыдів та представляня іх материяльной і духовой спадковины як вкладу в розвиток Нового Санча.

Але як сме уж рекли, Штетль веде тіж активны діяня в обшыри шыріня істориі і традиций інчых нацийональных меншын заселяючых Сандеччыну (або як звыкли гварити Лемкы: Сандецкой Руси). Тыма меншынами окрем Жыдів сут очывидно Лемкы, Циґане, але і населіня протестантскых віроісповідань. Ведучым орґанізациі є др Лукаш Поломскій, історик, учытель і публициста.

Кінцьом грудня/децембра 2024 р. Антоний Крог был оціненый Нагородом Міністра Культуры і Нацийональной Спадковины за роботу для народной культуры. Товды тіж прикликали сме найважнійшы епізоды з професийной і творчой працы лавреата, яка односила ся до лемківской народной культуры. Як куратор был одповідальный за орґанізацию славной выставы «Лемкы», яка зорґанізувана была в 1984 році в Ґалериі Давна Синаґоґа в Новым Санчы. Была то переломна выстава, бо перша, яка без стереотипів і тенденций представила Лемків в Польщы. Шырше о успішній творчости Крога чытайте в статі з грудня/децембра.

Наданя званя Почестного Амбасадора Сандецкого Штетля одбуде ся вчас зобраня членів орґанізациі. О даті подіі будут іщы інформувати.