Сумар дня на 18. марця 2025 р.

Приносиме вам сумар медияльной ґрупы ЛЕМ.фм+ на ден 18. марця 2025 р.

Высокопреосвященый Йона передал Чірчу ікону Богородиці

Інформацийный Центр Пряшівской Архієпархіі поінформувал, што в неділю 16. марця в грекокатолицкій парохі в Чырчу, Высокопреoсвященый Йона Максим, пряшівскій архієпископ і митрополита передал парохіі Ікону Пресвятой Богородиці під назвом Квіт Нетлінный. Торжество зачало ся од процесиі з іконом, а по приході до Храму Покровы Пресвятой Богородиці кыр Йона посвятил ікону і зачала ся літургія. В приповіди Владыка припомнул вірным істориі обявлінь в селі Чырч і підкрислил значыня переказуваня віры наступным поколіням. На задній стороні іконы, котру голова Грекокатолицкой Церкви на Словациі передал до Чырча, є ним руком написана інскрипция по церковнославяньскы. Так само по русиньскы, латинком єст там написане: «Пречыста Діва, котру нарід Божый в Чырчу любит і прославлят, най николи не залишыт місце сіє». Під текстом єст дата і підпис митрополиты. Полну реляцию з торжества в Чырчу найдете на нашым сайті.

Віцеміністер Томаш Шыманьскій одвиділи перемышльско-ґорлицку православну єпархію

В минулым тыжни 14. і 15. марця Віцеміністер Внутрішніх Справ і Адміністрациі Томаш Шыманьскій разом з віцедиректорком Департаменту Реліґійных Віроісповідань та Нацийональных і Етнічных Меншын, Ксеньом Альгаґ, одвиділи перемышльско-ґорлицку православну єпархію. Шыманьскій мал нагоду видіти ведены єпархійом ремонтовы роботы в церквах і дальшы етапы прац при будові новых святынь в Ґладышові і на св. Горі Явір. Додатково представникы власти были з візитом в церквах в Ганчовій, Бліхнарці і Конечній. В проґрамі візиты єдным з пункітв была стріча в Православным Осередку Милосердя «Елеос» в Ґладышові. Остатнім етапом візиты был Єпархіяльный Центр в Ґорлицях і Єпархіяльный Осередок Православной Культуры «Ельпіс».

Ґміна Крениця єст новым властительом желізничного дворця

14. марця ґміна Крениця підписала другій нотарияльный акт тыкаючый закупу желізничного дворця в Креници. Тым самым ґміна остала властительом дворця і переняла штырі желізничны ділянкы. Креницка стация была продана під конец січня/януара тр. за близко 2 мілийоны злотых. Новым властительом єст Ґміна Крениця, котра од років старала ся переняти обєкт. Квота была товды в цілости передана, але конечне было іщы підписати нотарияльны акты, жебы могли рушыти ремонтовы працы. Дворец жде тепер ґенеральный ремонт. Окрем полніня транспортовой функциі місце буде тіж дедикуване культурній діяльности – найде ся там видовискова саля, місце стріч сеньорів і світлиця. То важна інвестиция, особливо в контексті модернізациі леніі Подленже-Пєкєлко, по котрій курорт рахує на парократне збільшыня желізничного руху.

Не выпаляй трав!

В цілій Польщы єст тепер проблем з выпаляньом трав. В ґорлицкым повіті, на жаль, ніт кінця тому, зато повіт патролюют тихы дроны. О розвагу просят пожарникы і поліциянты. О тым інформуют тіж священникы, еколоґы і аґрономы. В звязку з трудном ситуацийом, службы подают, што тоты, якы підпаляют травы, будут караны. Дроны вытропили уж першых винных. Внескы о покараня были тіж зложены до суду. Выпаляня трав має неґативны консеквенциі не лем для чловека, але і природы, і як подают пожарникы – выпаляня не зліпшат землі, а лем нищыт місцеву фауну.

Фото: Лукаш Колцун