В ТАД одпремєрують Щастну выгру

Театер Александра Духновіча (ТАД) в Пряшові рихтує на пятніцю 21-го марца 2025-го року премєру пєсы Щастна выгра, котрой автором є Василій Сиґарєв. За ТАД о тім інформовав Йозеф Юрчішін.

Од Сиґарєва, сучасного російского драматурґа, котрый жыє в загранічу, має театер у своїм репертоарі і пєсу Детектор лжи, котра ся успішно грає вже од 2020-го року. Щастна выгра є за словами Юрчішіна якбы продовжіньом пепередньой інсценації, хоць не є з ньов звязана дійов. Но є жанрово подобна як сітуачна комедія із звязом на сучасны реалії. І так є подобна.

Нову пєсу на дочках русиньского професіоналного театру режійно приготовив гостюючій режісер Светозар Спрушаньскый, котрый в Пряшові вже зробив 12 інсценацій. Вшыткы были од російскых драматурґів, ці класіків або сучасных авторів, но як сам повів, черять пєсы оддыховішы з тыма, котры мають важнішу тему.

Центалныма героями є манжельска пара – Надежда і Борис. Щастна выгра є шаленов аналізов того, ці є обычайный чоловік приготовленый быти щастливым. Споминаній парі подарить ся выграти велику суму в лотерії, але по тім щастю стрічать їх сама зависть, гаміжность, приятелі їх огваряють, і так приятельства пропадають.

„Історія має свою простоту, але в їй одказі є так само моралность. Через сміх приходять слызы, автор в тім напрямі признав свого іншпіратора – Ґоґоля,“ повів режісер Спрушаньскый, котрый є і автором костімів, сценоґрафії, а ку пєсі выбрав і музику.

В новій пєсі з репертоару ТАД грають Людмила Лукачікова, Євґеній Либезнюк, Владиміра Штефанікова, Даніела Либезнюк, Йосиф Пантликаш, Василь Русиняк і Володимір Рогач. Переклад на русиньскый язык робив Валерій Купка. Щастна выгра є в 79-ій сезоні театру за порядком 402-ов премєров.