Сумар дня на 14. марця 2025 р.

Приносиме вам сумар медияльной ґрупы ЛЕМ.фм+ на ден 14. марця 2025 р.

«Капличкы Малопольщы» 2025

Рушыла тогорічна едиция конкурсу «Капличкы Малопольщы», якій направленый єст на єдиниці територияльного самоуряду з малопольского воєвідства, што піднимают консерваторскы, реставраторскы або будівляны працы при памятковых капличках находячых ся в Малопольщы. В тым році Самоурад Малопольского Воєвідства передаст на тоту ціль 750 тис. злотых. Цілю конкурсу єст захованя для будучых поколінь вартістных обєктів, будучых важным елементом культуровой дідовизны Малопольщы. Обєкты не мусят быти на воєвідскым ци ґмінным списку забытків, повинны лем мати артистичну і історичну вартіст. Максимальна квота дофінансуваня то 45 тис. злотых і не веце як 60% коштів реализациі цілости прац. Внескы мож складати до 4. квітня/апріля тр. В минулых едициях конкурсу повело ся одновити понад 780 обєктів, в тым цінны капличкы з Лемковины, за суму понад 8 млн злотых.

Підписаный нотаряльный акт тыкаючый закупу желізничного дворця в Креници

Як інформувал бургомайстер Крениці Пьотр Рыба, в минулу середу підписаный был першый з двох нотарияльных актів тыкаючых закупу желізничного дворця в Креници. «То великій крок в сторону реализациі нашой візиі і єдночасно важный момент в істориі того місця» – подал бургомайстер Рыба. Креницкій дворец был проданый під конец січня/януара тр. за близко 2 млн злотых. Новым властительом єст Ґміна Крениця, котра од років старала ся переняти обєкт. Квота была товды в цілости передана, але конечне было іщы підписати нотарияльный акт, жебы могли рушыти ремонтовы працы. Дворец жде тепер ґенеральный ремонт. Окрем полніня транспортовой функциі місце буде тіж дедикуване культурній діяльности – найде ся там видовискова саля, місце стріч сеньорів і світлиця. То важна інвестиция, особливо в контексті модернізациі леніі Подленже-Пєкєлко, по котрій курорт рахує на парократне збільшыня желізничного руху.

Неофіцийны назвы улиц в Высовій

В Высовій будут неофіцийны назвы улиц. Ґрупа жытелів курорту запропонувала властям ґміны Устя Рускє ввести локальны означыня доріг, котры особливо поможут туристам і курортникам одвиджаючым Высову. Як передала війт ґміны, Ева Ґарбовска-Ґура, заінтересуваня темом было барз великє, явило ся много опіній і коментарів. Пропозициі будут тепер оціняны комісийом. На першым місци выбераны будут назвы, котры навязуют до реґіону. Війт підкрислят, што зміны будут неформальны, не треба зміняти адресів, доводів ци документів. Не єст то зміна адміністрацийна, а локальне ознакуваня на потребы Высовой. Згідні з пляном улиці мают отримати своі назвы до кінця квітня/апріля, але ґміна не выключат зорґанізуваня дальшых соспільных консультаций.

Выстава ЛемАрт в Ряшові

В понеділок 10. марця в Містній Ґалериі Плястичных Шкіл в Ряшові одбыл ся вернісаж выставы ЛемАрт. То медженародный проєкт, в якым берут участ артисты з Польщы, Украіны, Бельґіі, Німец, Франциі, ЗША і Тунезиі. Джерелом іх інспірациі сут унікальны краєвиды, деревяна архітектура і фольклор Лемковины. Перша выстава з циклю ЛемАрт одбыла ся влони в Ґладышові. Выставу в Ряшові мож обзерати до 28. марця тр.