Сумар дня на 17. марця 2025 р.

Приносиме вам сумар медияльной ґрупы ЛЕМ.фм+ на ден 17. марця 2025 р.

Міністер Шыманьскій задеклярувал позитивный підхід до квестий звязаных з нацийональныма і етнічныма меншынами

В середу 12. марця проходило 87. засіданя Спільной Комісиі Уряду та Нацийональных і Етнічных Меншын. Стічу спілвели секретар стану МВСіА Томаш Шыманьскій та др Григорий Куприянович. Як передал міністер Шыманьскій: «Польска Республика має серед своіх громадян представників нацийональных і етнічных меншын. Держава хоче, жебы чули ся полноправныма громадянами, але і розвивали свою достоменніст, культуру, видячы в тым розвитку збогачыня державы, соспільства». Задеклярувал позитивный підхід до вшыткых квестий звязаных з нацийональныма і етнічныма меншынами в Польщы. Міністер однюс ся тіж до новелизациі меншынового закону. Як подал, хотят, жебы новелизация была ефектом спілпрацы, жебы была амбітна і на міру нашого часу, беруча до увагы вшытко тото, што діяло ся через 20 років істнуваня закону. Єдным з пунктів засіданя была зміна представника міністра властивого до справ публичной адміністрациі в складі комісиі. Становиско обняла Катажына Ковнацка, директорка Департаменту Віроісповідань та Нацийональных Меншын МВСіА. Окрем того была представлена інформация о поділі дотаций на меншыновы задачы в 2025 р. Бесідувано і о плянуваных діянях в рамках празднуваня ювілеів 20. річниці схваліня меншынового закону і 20. річниці істнуваня Спільной Комісиі Уряду та Нацийональных і Етнічных Меншын.

Головный Заряд Стоваришыня Лемків выразил спротив будові вежы і стежкы о конфедератах на Святій Горі Явір

В віторок 11. марця одбыло ся постійне засіданя Головного Заряду Стоваришыня Лемків. Од початку того рока засіданя проходят раз в місяци. Вчас стрічы бесідувано на тему ХVIII Світового Конґресу Русинів, якій того рока одбуде ся в днях 12.-15. червця/юнія в Румуніі. Порушена была тіж тема будовы вежы на Святій Горі Явір і місця, якє має припоминати о бытности барскых конфедератів. Согласно выражено спротив будові в місци, якє односит ся не лем до духовой, але і культуровой спадковины Лемків. Так само высловлено непокій і спротив што до плянів побудуваня інсталяциі, де будут припоминаны конфедераты. Заряд зазначыл, што нашы предкы были переслідуваны конфедератами і жытелі Лемковины вытерпіли од іх присутности вельо злого. Проф. Олена Дуць-Файфер здала реляцию зо стрічы з Комітетом Експертів Рады Европы в лютым/фебруарі, яка посвячена была охороні лемківского языка. Рішано і в справах повязаных з орґанізацийом 45. Лемківской Ватры на Чужыні, яка одбуде ся в днях 8.-10. серпня/авґуста в Михалові.

Муры православной церкви на Святій Горі Явір фурт роснут

Владыка Паісий, Архієпископ Перемышльско-Ґорлицкой Єпархіі Польской Автокефальной Православной Церкви поінформувал о стані прац при будові православной церкви на Св. Горі Явір. Завдякы сприятливій хвили будовляны працы в тым році зачали ся уж в першій декаді лютого/фебруара. Днес муры церкви роснут. В тым тыжни зачне ся рыхтуваня конструкциі даху святыні. Придбане єст уж дерево на кріквяну систему даху, як і 5 крестів на бані церкви, котры будут посвячены на третій ден Пасхы. Під кресты, коли замонтуют іх на банях, вложат запискы з іменами жертводателів. До завершыня будовы бракує іщы квоты близко піл мілийона злотых. Жертвы мож подавати на номер банкового рахунку єпархіі. Православна церков на Св. Горі Явір буде памятником трьох великых ювілеів 100-літя: Автокефалиі Польской Православной Церкви, Обявліня Божой Матери на Св. Горі Явір та Повороту Лемків до Православія.

Гев найдете деталі і номер банкового рахунку, на якій мож подавати жертвы на будову церкви на Святій Горі Явір.

Джерело фотоґрафіі: FB Arcybiskup Paisjusz