В Румунії засідала Світова рада Русинів. Конґрес одбуде ся в парламенті

В суботу 1-го марца 2025-го року в селі Пожоґа, в Румунії, одбыло ся 5-те меджіконґресове засіданя Світовой рады Русинів (СРР). Засіданя было повязане із святкованьом півокруглой річніці.

Членьска орґанізація Світового конґресу Русинів – Културне товариство Русинів Румунії, припомянуло собі 25 років од свого основаня. Як інформовав председа Світового конґресу Русинів Штефан Лявинець, на святкованю, котре проходило перед засіданьом, взяли участь і представителі державных властей, участный быв і депутат румуньского парламенту за Русинів Юліус Маріян Фірцак, як і представителі містной і жупной самосправы.

Тото святкованя было скапчане і з празднованьом Дня Русинів Румунії, котрый є Світовым конґресом Русинів схваленый на 3-го марца.

Світова рада Русинів, котра отримала своє засіданя по святочній части проґраму, обговорила дакілько пунктів, меджі котрыма быв і термін XVIII. Світового конґресу Русинів. На засіданю были участны вшыткы члены СРР, окрім члена за Северну Америку.

Конґрес одбуде ся в юні в парламенті

На попереднім конґресі, котрый проходив у 2023-ім році в Новім Саді, в Сербії, было делеґатами схвалене, же XVIII. Світовый конґрес Русинів одбуде ся в столиці Румунії – Бухаресті, в просторах румуньского парламенту.

„Обговорили сьме протокол зорґанізованя конґресу, спискы делеґацій, честованых гостів, округлы річніці, котры собі на конґресі хочеме припомянути,“ інформовав председа конґресу Штефан Лявинець.

„Дуже важным є, же першый раз Світовый конґрес Русинів одбуде ся в просторах парламенту. На засіданю Світовой рады Русинів сьме потвердили термін конґресу. Тот буде проходити в днях 12-го аж 15-го юна 2025-го року,“ інформовав далше Лявинець.

„Знаме, же політічна сітуація в Румунії є доста зла, складна. Є там політічна боротьба, знаме, яка сітуація є коло презідентьскых волеб. Сітуація є напружена. Але пан Ґеорґій Фірцак (член СРР за Румунію, позн. ред.) нас запевнив у тім, же термін, уквартельованя і просторы в парламенті суть забезпечены,“ сконштатовав председа Світового конґресу Русинів з тым, же тото потвердили і представителі румуньского парламенту, котры пришли на святкованя юбілею Културного товариства Русинів Румунії.

О співпраці буде рішыти ся перед конґресом

В рамках проґраму засіданя СРР в Румунії быв і пункт, котрый дотуляв ся жадости схвалити Декларацію о співпраці із Світовым конґресом Русинів од Саскачеваньской асоціації русиньской културы (Канада), а так само од Русиньского літературно-културного общества (Підкарпатя).

Як інформовав Штефан Лявинець, на засіданю Світовой рады Русинів через різны причіны наконець доїднало ся, же о тім пункті буде вырішовати ся на остатнім засіданю СРР, котре одбуде ся день перед початком XVIII. Світового конґресу Русинів.

Рада рішыла і нагороды

На засіданю обговорили ся і крітерії про удільованя двох нагород. Тов першов є Премія імени Василя Турока-Гетеша за вызначны резултаты досягнуты в рамках розвитку русиньской културы у вшыткых їй аспектах ці за вынятковы успіхы їй презентованя. Премія може быти уділена так орґанізаціям як і особам.

Членьскы орґанізації на тоту премію можуть приголосити своїх номінантів до 20-го апріля, і нагорода буде передавати ся почас засіданя XVIII. Світового конґресу Руснів.

Обговорены были і крітерії Націоналной премії за русиньске уменя імени Івана Манайла Pro Arte Ruthenorum, яку уділює Світовый конґрес Русинів і Русиньске націоналне самосправованя міста Вац в Мадярьску. Термін на поданя номінацій є так само до 20-го апріля, і премія буде святочно вручена лавреатови почас засіданя конґресу.