Сумар дня на 26. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 26. лютого/фебруара 2025 р.

Прелекция Валерия Падяка і акварелі Светланы Стеранковой

В Музею Русиньской Культуры в Пряшові в найблизшых двох тыжнях одбудут ся дві культурны подіі. Першом, 6. марця, буде Русиньскій Книжковый Фестіваль, в рамках котрого презентуваны будут новы русиньскы выданя, а літературознавця Валерий Падяк выголосит прелекцию до темы «Русиньскы великаны». В рамках подіі Музей хоче припомнути три ювілеі: 190. річницю народжыня Анатолия Кралицкого, монаха, писателя, історика, етноґрафа; 160. річницю смерти будителя Александра Духновича і 50. річницю смерти різбяркы Олены Мандич-Шіналі, єй найвеце знана робота то бронзовый памятник Томаша Ґаріка Масарика, президента і основателя Чехословациі. Черговом подійом в Музею буде 13. марця вернісаж выставы акварелисты Светланы Стеранковой, непрофесийной артисткы з Бардийова. Выставу буде мож обзерати до 14. квітня/апріля. Вступне на обі подіі дармо – початок о 16.00 год.

Бачваньскы Русины ідут на засіданя Світовой Рады Русинів

В понедільок 24. лютого/фебрурара в просторах Руской Маткы, русинькой орґанізациі в Рускым Керестурі в Войводині, одбыла ся стріча інформацийного орґану Руской Маткы. В рамках засіданя выбрана была штырьоособова делеґация, яка поіхат на засіданя Світовой Рады Русинів до Румуніі, котре одбуде ся в найблизшу суботу. Бачваньскых Русинів репрезентувати будут Михайло Фейса, Славко Пап, Мирон Джуня і Сильві Ґайдош. В рамках свойой робочой стрічы в Рускым Кеструрі, присутны бесідували тіж о заінтересуваню орґанізаций в присутности на 18. Світовым Конґресі Русинів, якій одбуде ся початком червця/юнія в Букарешті. На тот момент участны на Конґресі хотят быти представникы м.ін. здружыня КУД ДОК, Дружство за рускій язык, літертуру і культуру ци Здружыня за науку, культуру і комунікацию «Візантина». На найблизшым засіданю Світовой Рады Русинів в Румуніі за Польщу присутный буде Андрий Трохановскій.

В «Маґурах» о Вафці, Полянах, Мысцовій і інче

Вказал ся черговый номер краєзнавчого річника «Маґуры», што посвяченый єст Низкому Бескідови і Погірю. Публикация за 2024 роік чыслит близко 200 стран, на котрых найдете м.ін. допис Кжыштофа Пєнцяка «Борбы під Вафком, Фльоринком і Концльовом в вересни 1939 рока», Миколая Ґабла «Ріжні бывало зо спілхоснованьом церкви в Полянах і Вільхівци» ци текст «Повоєнный ремонт церкви в Мысцовій». О Медженародных Варштатах Іконописців в Новици статю написал Пжемыслав Піліх. Річник «Маґуры» єст публикацийом Студентского Кружка Бескідскых Провідників з Варшавы під редакцийом Славомира Міхаліка і Анеты Залуґі.

Стріча самоурядовцiв ґорлицкой землі з віцемаршалком

В минулу пянтицю віцемаршалок малопольского воєвідства Вітольд Козловскій стрітил ся з самоурядовцями ґорлицкой землі – Мирославом Вальонґом, ґорлицкым старостом і Марком Людвіном – членом заряду ґорлицкого повіту. Стріча тыкала актуальным справ і потреб реґіону. Серед омавляных тем нашли ся м.ін. заплянуваны на найблизшый час ініциятивы і проєкты. Три ґміны ґорлицкого повіту: Місто Ґорлиці, Ґміна Ґорлиці і Ґміна Санкова сут членами Стоваришыня Ґорлицка Функцийональна Обшыр, якому заряд малопольского воєвідства забезпечыл середкы на реализацию проєктів взятых до увагы в територияльній стратеґіі стоваришыня. Квота, яку має достати орґанізация, то 17 млн евро, в тым веце як 14 млн евро з Европейского Фундушу Реґіонального Розвитку і 3 млн евро з Европейского Соспільного Фундушу Плюс.