Сумар дня на 18. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 18. лютого/фебруара 2025 р.

Міністерство Культуры Словацкой Ресубликы одпесло ся до текучых проблемів меншыны

На першым засіданю Рады Влады Словацкой Ресубликы про народностны меншыны, котре одбыло ся в січни/януарі того рока, представникы русиньской меншыны порушыли тему новелизациі уставы о державным языку і будучого функцйонуваня меншыновых музеів. Неофіцийні бесідувало ся о можливым получыню парох музеів, котры актуальні находят ся під Словацкым Нацийоналным Музейом, в єдну інституцию, але Міністерство Культуры заперечат такым плянам. Міністерство підкрислило тіж, што консолідация публичных фінансів не влинула неґативні на діяльніст музеів – што не єст правдом. Як предала ведуча Музею Русиньской Культуры, Люба Кральова, музей мусіл собі порадити з буджетом меншым о 17%. Ограниченый буджет вяже ся з ріжныма проблемами, а ключовым єст брак середків на розвиток і ведіня досліджынь. Міністерство Культуры однесло ся тіж до темы новелізациі уставы о державным языку. Зато же не вшыткы меншыны на Словациі заняли становиско што до новелізациі, рішено пересунути термін реализациі задачы на 31. грудня/децембра тр. Тот час дозволит Міністерству на консультациі з меншынами. Цілю новелізациі єст зміцніня державного языка при рівночасным пошануваню языків меншын.

Конкурс «Гостинна Малопольща» – зголос свою ініцятиву

Заряд Малопольского Воєвідства просит до участи в конкурсі «Гостинна Малопольща». В тогорічній едициі акциі на реализацию задач заряд перезначыл понад 8 млн зл. Цілю конкурсу єст дофінансуваня цікавых туристичных подій, котры будут збогачати Малопольскє Воєвідство. Проєкты мож складати аж в 12 катеґориях, м.ін. «Творіня, розвиток, активізация і промоция продуктів та туристичной оферты реґіону» – в тым активна туристика, «Розвиток оферты соспільной туристикы» – як активізация осіб з особливыма потребами, ци «Лучыт нас Малопольска Туристика», што присвячена школіням і кооперациі медже предметами в туристиці. О дофінансуваня мож ся тіж старати при подіях промуючых Шляк Волошской Культуры і шляк, котрым втікал ротмістр Вітольд Пілецкій з Аушвіц. Окрема катеґория присвячена єст подіям звязаным зо спадковином Карпат ци активном роверовом туристиком. Треба памятати при складаню внесків, же дана ініциятива не може зачати ся скорше як 1. марця і може тырвати найдолше до 31. грудня/децембра 2025 рока.

Варштаты дла діти в Еколоґічным Осередку Едукациі в Ожынній

Еколоґічный Осередок Едукациі в Ожынній просит діти на дві варштатовы стрічы. Першы варштаты присвячены нічным птахам пройдут 15. марця і направлены сут на діти выже 10 років. В пляні єст орнітолоґічный спацер, прелекциі, дискусиі та нічне наслухуваня совы. Тыжден пізнійше, 22. марця пройдут астрономічны варштаты, зз прелекцийом на тему звізд та обсервацийом неба. На подію прошены сут діти в віку од 8 до 11 років. Варштаты сут дармовы, але обовязує скорша регістрация. Полный проґрам подіі та дрібниці находят ся на фейсбуковым сайті Осередка.

Хочут одкрити новый Ценр Лемківской Культуры

В Команчы сут пляны побудувати Лемківскій Центр Культуры. Ініциятором думкы єст о. Ян Піпка ведучый Братсвта Грекокатолицкой Молодежы Сарепта. Музей найде ся в понад 100-літній деревяній лемківскій хыжы. В середині має быти презентувана збірка лемківскых выробів ручной роботы по нежыючых уж артистах з Команчы – Дариі і Штефаніі Боівках. То унікатова на світову скалю збірка кривульок і лемківского облечыня, твореных і реставруваных артистами, і одданых інчыма людми. Музей буде місцьом заєдно до презентациі лемківской штукы, як і ведіня артистичных варштатів. Покликана Братством Фундация Пророка Ілиі закупила уж хыжу, котра тепер жде на реновацию.