Сумар дня на 17. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 17. лютого/фебруара 2025 р.

Експерты Рады Европы взяли участ в округлым столі посвяченым ситуациі лемківского языка

13. і 14. лютого/фебруара в Нижньошлезскым Воєвідскым Уряді во Вроцлаві проходила візита Комітету Експертів Европейской Карты Реґіональных або Меншыновых Языків. На стрічы ведены были тристоронны дискусиі тыкаючы рекомендаций Комітету Експертів до IV Рапорту з реализациі постанов Европейской Карты Языків. В поєдных округлых столах брали участ Експерты Рады Европы і представникы державных власти Польской Республикы. Окрем інчых присутны были і хоснувателі меншыновых языків. Бесідувано о проблемах звязаных з імплементацийом записів Карты, з освітом, едукацийом, медиями і двоязычныма таблицями, глядаючы моделю іх розвязаня. Як поінформувало Стоваришыня Лемків, представникы Стоваришыня в особах проф. Олены Дуць-Файфер і Северияна Косовского взяли участ в округлым столі посвяченым ситуациі лемківского языка в контексті реализациі через Польску Республику Европейской Карты Реґіональных або Меншыновых Языків. Олена Дуць-Файфер бесідувала о проблемах повязаных з едукацийом і браком реализациі властями записів Карты. О квестиях з обшыри лемківскых медий бесідувал Севериян Косовскій. Комітет зрыхтує рапорт, якій пак буде представленый польскым властям цілю поправы ситуациі лемківского языка.

Мож уж придбати перше тогорічне чысло «Бесіды»

Явил ся першый тогорічный номер часопису Стоваришыня Лемків «Бесіда», ч. 1 (202) за місяці січен/лютый 2025 р. В номері прочытаме м.ін. статі Северияна Косовского – “Мария Кобані: «Не бесідує ся в тій хвили нич о Явожні»” “Русиньскы вчены взяли участ в Конвенциі ASEEES в Бостоні”, ци Наталиі Малецкой-Новак – “Антоний Крог з Нагородом Міністра Культуры і Нацийональной Спадковины за роботу для народной культуры”. Окрем того єст допис Петра Медвідя о святкуванях Дня Русинів Польщы. Андрий Ковальскій написал о концерті «Ластівочкы» в Нацийональным Форумі Музикы во Вроцлаві. В найновшій «Бесіді» был тіж опубликуваный першый фраґмент тлумачыня зробленого Петром Криницкым – то «Алісины пригоды в Чудержаві» (в ориґіналі «Alice’s Adventures in Wonderland»; в польскым перекладі – «Alicja w Krainie Czarów»). В «Бесіді» будут одтепер друкуваны фраґменты тлумачыня.

Нова книжка присвячена Підкарпатскій Руси

Як інформує Общество приятелів Підкарпатской Руси, на книжковый рынок достала ся нова чешско-анґлицка публикация присвячена істориі Підкарпатской Руси в чехословацкым періоді. То книжка з назвом «Чехословацка „колонизацийна“ політика на Підкарпатскій Руси медже роками 1919–1939», авторства Еріка Люкаса. Веце о реченій публикациі найдете в дописі на нашым портали.

«Як бесідувати сучасно о Новосільскым» – дискусийный панель в Кракові

Нацийональный Музей в Кракові просит на дискусийный панель: «Як бесідувати сучасно о Новосільскым». Дискусия пройде з участю о. дра Генрика Папроцкого, проф. Александра Наумова з Universita’ Ca’ Foscari, Ягайлоньского Університету і проф. Александры Суліковской з Варшавского Університету, Нацийонального Музею в Варшаві. Панель вюл буде проф. Мирослав Крук з Ґданьского Університету, Нацийонального Музею в Кракові. Стрічы товаришыл буде концерт церковной музикы. Подія пройде в Палаци Біскупа Еразма Цьолка – Одділіню Нацийонального Музею в Кракові в найблизшый четвер 20. лютого/фебруара о 17.00 год.