«Голосы Русинів Підкарпатя» – середа, 18.10 год.

Репрезентатівной картков Підкарпатя фурт были нашы малярі. То бізовно зато, же красу нашых Карпат мож передати двома способами: описати словами або зобразити на полотні.

То о Карпатах і вшыткім з нима повязаным: бываня тутешніх обывателів, їх традіції ітд. Зато і суть у пріоріті малярі Карпат, історія котрых зачінать ся Бокшайом і Ерделі, а у наш час веде до Микиты і Свалявчика.

Але суть і такы малярі, котры не мають ниякых тітулів і звань, они не провели ани єдной выставы, не суть членами ани єдного малярьского общества, і не брали участь ани в єднім пленері. Но не позераючі на то вшытко, они суть популарныма, а образы їх натілько ся скоро продають, же кебы і хотіли зробити выставу, та не мають з чім.

Єдным з такых «слободных малярів» є Іван Архій – порядный і благый Русин, виділо бы ся, же цалком лишеный амбіцій славы. Але тот чоловік намальовав на заказку понад тісяч портретів обывателів краю. Подумайте над тым, то ціле войско. І роботы його неповторятельны. Окрім того многы полотна Архія находять ся у стовках хыж і колекціях нелем Підкарпатьців, нелем на Україні, но і за граніцьов.

Так знамый збератель, Русин, общественный русиньскый діятель на Словакії – Петро Микула є нелем любительом Іванового пензлика, але і щірым цімбором Архія. Якраз Петро Микула і говорить, што наш герой має іщі доста часу, абы у повній мірі розкрыти свій талент.

Іван Архій ідентіфікує себе Карпаторусином і гордить ся тым. Як щірый патріот він часто приходить на поміч културолоґічным обществам, помагаючі намальовати обкладку книжкы або журнала, ці дакілько ілустрацій.

Слухайте «Голосы Русинів Підкарпатя» в середу 29-го януара 2025 р. о 18.10 год., або повторіня в четверь 30-го януара о 4.30 год. і в суботу 1-го фебруара р. о 11.00 год. за русиньскым часом.