Сумар дня на 21. січня/януара 2025 р.

Приносиме вам сумар медияльной ґрупы ЛЕМ.фм+ на ден 21. січня/януара 2025 р.

Святочна академія в Театрі Александра Духновича в Пряшові

Уж в тым тыжни в Пряшові одбуде ся святочна подія в рамках святкувань Рока Русиньского Языка. Припомнийме, што в 2025 році Русины на Словациі припоминают собі 30 років од святочного выголошыня кодифікациі русиньского языка. Уж в найблизшу пятницю 24. січня/януара Русины припомнут си річницю святочном академійом в просторах Театру Александра Духновича в Пряшові. Подію рыхтує Русиньска Оброда на Словациі. Тота найстарша русиньска пореволюцийна орґанізация была ініциятором і має неоцінену заслугу при кодифікациі русиньского языка на Словациі. На академіі запрезентуют ся і умельці професийональных русиньскых тілес – Театру Александра Духновича і Піддукляньского Умелецького Людового Субору. Дальшы подіі в рамках Рока Русиньского Языка будут проходити протягом цілого рока, дакотры іщы в тым місяци. Будеме о них інформувати.

Крениця зас стане ся зимовом столицьом світа

Крениця рыхтує ся до дальшой спортовой подіі на світовым рівни. В марци того рока зас стане ся зимовом столицьом світа. Так як влони, на Креницкій Яворині одбуде ся Чемпіонат Світа в альпейскым сновборді. Змаганя Чемпіонату Світа в сновборді мают быти орґанізуваны на Креницкій Яворині наступных пят років. Найблизшы змаганя одбудут ся 1. і 2. марця тр. В тым році орґанізаторы прирыхтуют о вельо векшы трибуны як влони, з огляду на велику популярніст подіі. До Крениці приде близко 200 спортовців з цілого світа. Чемпіонат Світа певністю влине на промоцию курорту, за справом телевізийных трансмісий о світовым засягу.

Малопольща задбат о поправу енерґетичной ефективности будинків

Малопольска Аґенция Реґіонального Розвитку підписала догварнія з Банком Державного Господарства, завдякы котрым малопольскє воєвідство отримат доступ до 85 млн злотых на поправу енерґетичной ефективности будинків в формі пожычкы. Наборы внесків рушат в лютым/фебруарі тр. 60 млн злотых буде передане на поправу енерґетичной ефективности в будинках публичного хосну, а 25 млн в вельородинных будинках. Має то влинути м.ін. на зменшыня коштів огріваня і охорону середовиска.

Ґміна Устя Рускє жде на опініі про новоодкрыты автобусовы курсы

Ґміна Устя Рускє припоминат, што штоденно до диспозициі подорожуючых сут курсы в рамках новоодкрытых автобусовых перевозів на трасі Ізбы – Высова і Конечна – Высова. Перша траса веде з Ізб через Баницю, Ставишу, Снітницю, Брунары, Чарну, Устя Рускє і Ганчову до Высовой. Друга іде з Конечной до Высовой через Ждыню, Ґладышів, Смерековец, Реґєтів, Шквіртне, Квятон, Устя Рускє і Ганчову. На час зимовых вакаций, котры як раз ся в Малопольщы зачали, на обох трасах обовязує зміненый розклад ізды. Дрібниці мож найти м.ін. на фейсбуковых сайтах перевозників: Перевозовой Фірмы «Ґромалюс» і Олькама. Єдночасно ґміна жде на опініі подорожуючых, ци розклады ізды сут добрі сконфіґуруваны, ци єднак добрі бы было дашто змінити. Суґестиі што до конкретных годин одізду з місцевости, котрых то тыкат, мож лишати в коментарях на фейсбуковым сайті Ґміны Устя Рускє або безпосередньо в уряді ґміны.