Ден Русинів Сербіі

17. січня/януара 1751 р. радник Мариі Терезины і адміністратор Кральовско-Державного Бачского Дистрикту в Зомборі – Франц Йосиф де Редль, підписал першый документ о населюваню 200 русиньскых грекокатолицькых родин до товдышнього Великого Керестура. Як раз на памятку той подіі, каждого рока Русины з Сербіі празднуют своє Нацийональне Свято – Ден Русинів Сербіі.

Як є звыком (што было і влони), покля Ден Русинів выходит на робочый ден (так як і днешню пятницю), централны святкуваня сут пересунены на найблизшый свобідный. Так тогрічны святкуваня Дня Русинів Сербіі пройдут в найблизшу суботу, 18. січня/януара.

Центральны празднуваня одбудут ся в Сримскій Митровици. Святкуваня зачнут ся од архієрейской Божеской Літургіі в церкви Вознесіня Господнього, котру одслужыт владыка Георгій Джуджар, грекоткатолицкій керестурскій єпарха. Пак в парохіяльным домі буде выставленый етно-стіл, якій зрыхтуют члены Здружыня Жен «Бикичанки».

Тогорічны святкуваня будут вынятковы з той причыны, што участникы припомнут 100. річницю од першого выданя «Руских новинох» і 80 років Новинарско-Выдававничой Установи «Руске Слово», значыт русиньскых медий в Сербіі. В рамках святкувань будут выступувати як раз представникы – робітнникы «Руского Слова».

О 20.00 год. зачне ся святочна академія в Великій Сали Театру «Добрица Милутинович», в котрій запрезентуют ся русиньскы колективы і солисты. Ту запрезентую ся м.ін. Мішана співоча ґрупа Руского Культурного Центра з Нового Саду, Нацийональна Оркєстра під руководством Мирослава Папа і волкалный солиста Йовґен Надь. Будут тіж дальшы, як Мішана співоча ґрупа «Руски соловеї» Дружтва Русинів в Сримскій Митровици.

Сербскы Русины своі святкуваня каждого рока орґанізуют в інчым селі або місті, в котрім жыє русиньска комуніта. Традицийом є, што на ріжных урядах, школах ци культурных домах святочно вывішаны сут русиньскы фаны.

Дата Дня Русинів Сербіі была офіцияльно призначена в 2007 р. Першы празднуваня одбыли ся в січни/януари 2008 р.