Сумар дня на 15. січня/януара 2025 р.

Приносиме вам сумар медияльной ґрупы ЛЕМ.фм+ на ден 15. січня/януара 2025 р.

Томаш Квока здобыл ступін габілітуваного доктора

6. листопада/новембра 2024 р. Рада Дисципліны Языкознавство Ягайлоньского Університету єдноголосно підняла рішыня надати др. Томашови Квоці ступін габілітуваного доктора в обшыри гуманістичных наук в дисципліні языкознавство. Тото престіжне рішыня єст выразом узнаня для выдатных науковых осягнінь Томаша Квокы, його вкладу в розвиток языкознавчых бадань і заанґажуваня в популяризацию наук. Габілітацийный процес обнимал оціну наукового доробку кандидата, в тым його публикаций, бадавчых проєктів та участи в медженародных конференциях. Др габ. Томаш Квока досліджат семантику і етимолоґію полудньовославяньскых языків з особливым увзглядніньом сербского языка, в своій науковій роботі занимат ся тіж лемківскым языком і охороном лемкіской спадковины. Єст автором м.ін. книжкы пн. «Войводина і єй Русины. О языку, культурі і істориі войводиньскых Русинів», спілавтором книжкы «Бесідуйме по лемківскы» ци редактором публикаций «Лемківскы приповідкы і приказкы зо Святковы Великой і околиц» і «Лемківскы співанкы зо Святковы Великой. Співник». Походит з Ґорлиц. Сердечні ґратулюєме!

Засіданя Воєвідской Рады Соспільного Діалоґу

В понедільок 13. січня/януара одбыло ся засіданя малопольской Воєвідской Рады Соспільного Діалоґу з участю маршалка Лукаша Смулкы. Участны были тіж м.ін. ведучый рады Михал Акшак-Окіньчыц (Akszak-Okińczyc) ци Малґожата Малух – війт Ґміны Санкова, презеска Заряду Форум Війтів, Бургомайстрів і Президентів Малопольщы. Головна тема стрічы тыкала загорозы звязаной з ліквідацийом копальні ZGH Bolesław, але бесідувано тіж о реструктуризациі PKP CARGO S.A. і єй наслідствах для малопольского воєвідства та о трансформациі Польской Почты. Задачом Рады Соспільного Діалоґу є выражати становиска і опініі, котры тыкают важных соспільных квестий, звязаны сут з професийныма звязками і орґанізациями працодавців. Може розсмотрювати соспільны або економічны справы, што тыкают реляций медже працодавцями і працівниками. В Малопольщы Рада была покликана в грудни/децембрі 2015 рока.

Розвиток желізниці і новы курорты

Так само в понедільок в Кракові засідали Парляментарный Ансамбль дс. Розвитку Малопольщы та Парляментарный Ансамбль дс. Курортного Лікуваня, Мундуровой Службы Здоровля, Регабілітациі і Курортных Ґмін. В стрічы з маршалком воєвідства участ взяли послы і посланкы, представникы выміненых ансамблів. Ведучом темом засіданя была діяльніст Малопольской Желізниці і желізничной інфраструктуры, прошла тіж дискусия о Малопольскых Довозовых Леніях, якы минулого рока перевезли 4 млн пасажерів в Малопольщы. Дискутувано і о закупі нового табору та о черговых ґмінах, котры аспіруют до основаня курортів або стреф курортной охороны. На обшыри малопольского воєвідства є пару ґмін, котры хотят о тото внескувати.

Себастиян Пухайда новым заступцьом бургомасйтра Ґорлиц

Од 2. січня/януара тр. згідні з заряджыньом но 3/2025 Бургомайстра Міста Ґорлиці на становиско Заступці Бургомайстра был покликаный Себастиян Пухайда. Єст абсольвентом права Ягайлоньского Університету, професийну практику здобывал в канцеляриях в Кракові і Ґорлицях. Радцівску аплікацию одбыл в Округовій Ізбі Правных Радців в Кракові, успішні здал еґзамін на радцю. Од 2015 рока єст звязаный з Містным Урядом в Ґорлицях. Остатніх десят років Себастиян Пухайда заанґажуваный был в кажду важну для Ґорлиц справу і брал участ в підниманю вшыткых важных рішынь.