Сумар дня на 14. січня/януара 2025 р.

Приносиме вам сумар медияльной ґрупы ЛЕМ.фм+ на ден 14. січня/януара 2025 р.

Лідеры Трансграничной Функцийональной Обшыри Низкій Бескід дискутивали про спільну стратеґію на будуче

В минулым тыжни, 10. січня/януара в Ящеві стрітили ся лідеры Карпатского Еврореґіону. В часі стрічы дискутували о діяльности покликаной Трансграничной Функцийональной Обшыри Низкій Бескід та плянах на будуче, як поправити туристичну атракцийніст Низкого Бескіду. Трансгранична Функцийональна Обшыр Низкій Бескід єст єдным з трьох проґрамів, котры возникли з ініциятивы Стоваришыня Карпатскій Еврореґіон. Обнимат по польскій стороні коросняньскій, ясельскій і ґорлицкій повіты, а по словацкій окресы Бардиів, Свидник і Стропків. Цілю того проґраму єст переламати державны барєры та спільно старати ся через самоурядовців ци орґанізациі з обох держав о розвиток трансграничного реґіону. Доцільово заанґажуваны єдиниці мают ся разом старати в будучых трансґраничных проґрамах о дофінансуваня Европейской Уніі. Спільна стратеґія ТФО Низкій Бескід має быти готова під конец червця/юнія тр.

Президент Словациі нагородил двоє Русинів – Анну Берґерову і професора Юрия Сіпкa

11. січня/януара в будинку Словацкой Фільгармоніі прошла ґаля вручыня державных нагорід з нагоды 32. річниці выникнутя Словацкой Республикы. Того рока першый раз при своій функциі нагороды передавал президент Петер Пеллеґріні. Серед 18 выріжненых ордером, з чого половина посмертні, нашло ся двоє Русинів. Анна Берґерова была нагороджена in memoriam Ордером Людовіта Штура ІІ клясы за вынятковы заслугы для демокрациі та людскых прав і іх охороны. Ордер одобрала дівка выріжненой. Зас економа професора Юрия Сіпкa выріжнено за шыріня доброго імена Словацкой Ресубликы поза границями державы.

Тирват конкурс «Задбаный забыток» – з думком о тых што дбaют про забыткы

Зачала ся нова едиция конкурсу «Задбаный забыток» орґанізуваного Міністром Культуры і Нацийональной Спадковины при спілпрацы з Ґенеральным Консерватором Забытків. Цілю конкурсу єст нагородити властителів ци заряджаючых забытками за іх роботу і опіку. Што важне – в конкурсі можут брати участ властителі обєктів, котры сут вписаны до Реґістру забытків. Конкурс поділеный єст на пару катеґорий: утырваліня забытковой вартости; ревалоризация культурового простору; адаптация забытків; деревяна архітектура і будівництво; Забыток доступный; забыткы технікы та специяльне выріжніня за властиве хоснуваня і постійну опіку над забытком. Лавреаты та выріжнены в конкурсі отримают почестну ґрамоту Ґенерального Консерватора Забытків та табличку до ознакуваня обєкту як задбаный забыток. Зголошыня мож пересылати до 15. лютого/фебруара, формуляр та реґулямін конкурсу находят ся на офіцийным сайті орґанізатора.

Потяговый білет за злотівку дла діти і молодежы

Ближыт ся час зимовых вакациі. З той нагоды малопольскє воєвідство просит до участи в акциі «Малопольскій білет на зимовы вакациі». Од 18. січня/януара до 2. лютого/фебруара в потягах орґанізуваных малопольскым воєвідством і в автобусовій комунікациі, котру обслугує малопольскій перевозник, діти і молодіж будут мочы подорожувати за символичну злотівку. Часова оферта закладат неограничене чысло переіздів для каждого ученика, котрый вкаже в поізді важну шкільну леґітимацию, конечні зо знимком. Білеты будут доступны до придбаня в касах і в мобільных аплікациях.