З Новым Роком!

З Новым Роком Вас витаме! Щыро і сердечно, без ниякых вынятків. Вінчуєме, што найліпше – най ся сполнит по всіх хыжах на Лемковині.

А же сме традицийно залюблены в давным, але якістным – то повінчуєме Вам як давно. «Пятка» зо заду (по девятдесятьох роках) ся і так згаджат, прото приймийте желаня – най ся щестит, дарит, каре! В Новым 2025 Році.

На Новый Рік

Хыбаль то лем я повідам,
Же тот рочок планный был?
Тыж – каждому была біда,
Преця каждый хоц-як жыл!

І пінязей бракувало,
А ту все лем плат і плат!
Зерна, грульок было мало,
Єдным словом, – вшытко дзяд!

Хоц ся чловек наоначыл
І наробил так, як фрас,
Нич не зыскал, лем богачы,
Што стігают скору з нас!

Якій буде тридцет пятый
Рочок, гардый або ніт?
Не знат і Асафат святый
Вера не знат, аж го взріт!

Або ліпшый, або планшый,
То нам братя вшытко – фук
Перетримаме мы го іщы,
Руснак твердый, яко сук!

Вытримаме аж до смерти,
А не лем до другых свят,
Не зіл нас тридцет четвертый
Не зіст нас і тридцет пят!

Асафат Потыкач