З Мушыны до Татер Беляньскым експресом

На кінцю 2024-го року вернув на штреку облюбленый Беляньскый експрес, котрый подорожуючіх одвезе із словацькых Татер до польской Мушыны і назад. І то реґуларно кажду суботу і неділю аж до 23-го фебруара 2025-го року.

Беляньскый експрес ходить почас вікендів двараз за день. Із штації Попрад-Татры одходить о 7.29 год. і 15.29 год. З Мушыны до Татер одходить влак о 10.00 год. і 18.00 год. Влак стоїть в Студенім Потоці, Кежмарку, Спішскій Белій, Подолинцю, Старій Любовні і Плавчу.

Як припоминать Пряшівскый самосправный край, котрый є єдным із ініціаторів Беляньского експресу, Мушына є купельным містом, котре в зимнім періоді дає і можливость ліжовати, кедьже там находить ся ліжарьскый центер Дві Долины Мушына – Вєрхомля. Близко є і далше купельне місто Криниця.

На словацькім боці граніці любителі історії можуть навщівити наприклад памяткы в Кежмарку ці град в Старій Любовні, любителі природы зясь можуть іти до Татер, де суть безконечны можливости про турістіку і зимны шпорты.

На Беляньскый експрес мож купити звыгоднены листкы EUROPA REGIONAL Muszyna, і діти до 6 років, котры подорожають в супроводі дорослого, мають експрес безплатно.