Высокопреосвященый Йона посвятив Якубянку. Владыка Кіріл посвятив Шыраву

Вже стало звыком, же пряшівскый архієпіскоп і митрополіта на праздник Богоявленія Господа приходить до русиньской парохії Якубяны, Старолюбовняньского окресу, де одслужыть архієрейску літурґію, по котрій наслідує посвячіня містного потока Якубянка.

Так тому было і теперь, 6-го януара 2025-го року, коли до Якубян на Богоявленіє першый раз на тій посаді пришов Высокопреосвященый Йона Максим, пряшівскый архієпіскоп і митрополіта.

Торжество почало процесійов із пасторачного центра до містного Храму свв. апостолів Петра і Павла. Перед храмом кір Йону привітав староста села Йосиф Мачуґа, наслідно містный парох Петро Мальцовскый.

Пак вже наслідовала церьковнославяньска архієрейска літурґія, на котрій владыка приговорив ся участным і в проповіди. По закінчіню літурґії вшыткы вєдно в процесії перешли ку потоку Якубянка, котрый владыка Йона посвятив і повзбудив людей, жебы хосновали посвячену воду, жебы каждому служыла на выздоровліня душы і тіла.

Воду Земпліньской Шыравы посвятив кошыцькый єпарха – архієпіскоп Кіріл Василиь. На берегах Зепмліньской Шыравы находить ся найвекше путницьке місце Кошыцькой єпархії – Клокочів.

Владыка Кіріл наперед так само одслужыв архієрейску літурґію в містнім Храмі Успенія Пресвятой Богородіці, по котрій процесія – священици і віруючі на чолі із своїм архіпастырьом, выбрали ся ку берегам Земпліньской Шыравы.

Архієрейску літурґію з посвячіньом воды із Кошыцькой єпархії тот рік в прямім ефірі высылала і державна телевізія.