Майоріта

Тілько того ся діє в одношіню з Українов, же бы сьме уж може подакторы і забыли на задачі, котры Україна має выповнити у вопросах народностных меншын, жебы могли далше іти переговоры о вступі до Европской унії.

Наперек тому, же тым вопросам реално ани Україна, а ани Брусел не дає таку вагу, яку бы было треба дати, Київ мінімално імітує, же тоты діла рішыть. А в припаді Мадярів і реално штось мусить рішыти, бо в Будапешті не сидять індіферентны брусельскы урядници, котрым є вшытко єдно, і в Будапешті є влада, котра має право вета.

Но і так, як о тім інформує сайт Омбудсмана Україны, на початку новембра одбыла ся в Закарпатьскій области Україны моніторінґова навщіва, котра мала задачу моніторовати імплементацію Стратеґії підпоры реалізації прав і можливостей особ, котры належать до ромской народностной меншыны в україньскім обществі на період до року 2030; Закона о народностных меншынах (комунітах) Україны; як і Державного цільового націонално-културного проґраму Єдность в розмаїтости на період до 2034-го року.

Не бійте ся. Жадне несподіваня ся не одбыло. Подля вашых і моїх очековань є знова вшытко в порядку. Каждый є спокійный, меншыны мають вшытко, што їм треба. Меншныновый рай – Україна, предсі не може мати даякы недостаткы в тій справі.

Окрім того, же вшыткы такы статі, котры пишуть о такых моніторінґах, вызерають як через індіґо, як через індіґо вызерать і то, з кым ся властно комунікує при такых стрічах на Підкарпатю. Мадяры, Ромове, Словаци, Румуны. Конець.

І мы уж не першый, а сторпоцентно ани не послідній раз можеме конштатовати, же Русины, котры бы реално могли вказати дзеркало вшыткым тым стратеґіям, законам, документам із благородныма назвами, але резултатами в многых припадах на уровни близкій фізікалному терміну абсолутной нулы, запрошены не были.

Навеце, не мав бы такый урядник, якым є омбудсман, думати на права вшыткых?

Покля тото діє ся на цілодержавній уровни, розъїдало бы нас то єднако, але могли бы сьме самы себе успокоїти холем дакус тым, же тот штат – потомок націоналістів і комуністів, якый ся уж видить в Европі, іщі все не дав нам нашы права. Но кедь ся тото діє почас моніторінґу в Закарпатьскій области, де сьме офіціално вызнаны, пак є то вже дакус вельо і на коня, як ся бісідує.

Навеце, не мав бы такый урядник, якым є омбудсман, думати на права вшыткых? О то веце тых, котрым ся робить кривда з боку державы?

Як єм спомянув, не є то першый раз, што на Русинів забыло ся. А іншак є вшытко в порядку. Вшыткы меншыны вшытко мають. А як бы і вшытко не было в порядку, спробуйте в часі войны пысковати. Скоро допыскуєте.

На за порядком уж не знам котру іґнорацію Русинів і в области, де суть офіціално вызнаны, можеме позерати двома способами. Тым першым є неґатівне поясніня.

Є то за порядком уж не знам котрый прояв абсолутной іґнорації корінного народа Підкарпатя, і вказованя того, яка є реална тварь україньской меншыновой політікы. Русины суть выголошеный неприятель, а жаден процес інтеґрації нам не перешкаджать в тім, жебы выголошеным неприятельом, топтаным народом зістали.

Або мож прияти і позітівне поясніня тых справ. І то таке, же в Києві вже зрозуміли, же в Закарпатьскій области Україны досправды русиньска меншына не є. Бо в тій области сьме майоріта. Зато про нас треба іншы моніторінґовы навщівы.

Покля бы платила друга можливость, пак ся уж не знам дочекати, коли нам то Київ офіціално оголосить.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.