Беатіфікація Петра Павла Ороса одбуде ся в Білках

Як інформовав офіціалный сайт Мукачовской ґрекокатолицькой єпархії, 19-го децембра 2024-го року Дікастерія у справах вызнаня святых інформовала о даті і місцю святочной беатіфікації – выголошіня за блаженого, отця Петра Павла Ороса.

Слуга Божый Петро Павел Орос (рр. 1917 – 1953) быв священиком Мукачовской ґрекокатолицькой єпархії, якый быв убитый совітьскым міліціонарьом.

Святочна беатіфікація одбуде ся 3-го мая 2025-го року в селі Білкы на Підкарпатю. Якраз село Білкы было про отця Петра Павла Ороса послідньов офіціалнов парохійов, на котрій служыв перед ліквідаційов Мукачовской ґрекокатолицькой єпархії комуністічныма властями.

Інтересным фактом є і то, же Діккастерія у справах про вызнаня святых того оголосила 19-го децембра. В тот день у 1944-ім році мав подля свідоцтва отця Стефана Бендаса блаженый священомученик Теодор Ромжа, єпіскоп мукачовскый, тайно рукоположыти отця Ороса на єпіскопа.

Торжество очолить Його Емінeнція Кардінал Ґжеґож Рись, архієпіском і митрополіта лодьскый (Польща).

Як припоминать Мукачовска ґрекокатолицька єпархія, буде то першый раз в історії Підкарпатя, же буде чоловік із той землі выголошеный за блаженого якраз на домашній землі.

Папа Римскый Франціск іщі 5-го авґуста 2022-го року прияв на авдієнції кардінала Марчелла Семераро, префекта Дікастерії у справах вызнаня святых, почас котрой потвердив декреты, якы дотуляють ся беатіфікаційных процесів. Першым в тім списку быв декрет вызнаня мучеництва Слугы Божого отця Петра Павла Ороса, русиньского священика Мукачівской ґрекокатолицькой єпархії, тайного єпіскопа.

Веце о жывоті Петра Павла Ороса можете дочітати ся в нашій статі ту.