«Слово» – 24-та неділя по Сошествії Святого Духа – неділя, 9.00 год.

Ку Ісусови приношали много хворых ці опанованых нечістынма духами, а Він їх выздравляв. Раз пришов начальник сінаґоґы Яїр, котрого дівочка умерала. Просить Ісуса: подь, влож на ня руку, жебы была здрава. Ісус встав а ішов з ним.

Но по дорозі, коли народ Його притисковав з каждой сторны, єдна жена, котра од дванацятьох років терпіла на кровотечіня, перетисла поміджі народ, і легонько ся дотулила края Його облечіня. Но наперед собі повіла, коли так зроблю, буду здрава. А справды, такой їй перестала течі кров, і была цалком выздравлена.

Уж-уж ся хотіла в тихости вытратити поміджі многый народ никым непозната. Но Ісус ся заставив, і повів: хто ся мене дотулив? Петро зареаґовав: тадь цілый час тя народ притискать а ты ся на таке звідуєш? А тогды і тота жена, якбы в дусі говорила: послухай свого ученика. Но Ісус ся озвав і повів: хтось ся мене дотулив, бо єм зачув як з мене вышла сила. Тогды уж уеж жена ся не могла веце затаїти, вышла оперед ньом і повіла цілу правду з великым страхом і трясіньом.

Мы собі повіме, та чом ся трясла, тадь могла выдати свідчіня: Я єм терпіла довгы рокы а Він мене выздравив. Но она ся і дотулила, а особа, котра є нечістов і дачого ся дотулить робить то нечістым. Так она по цілый час не могла хосновати дома нич обще, бо чого ся дотулила, было уж нечісте. І вшыткых тых людей, через котрых ся перетисла ку Ісусови, зробила нечістыма. А і самого Хріста. А так теперь з векликым страхом передступує перед Ісуса, чекать, што буде наслідовати, ці не дістане кару за тото своє діло.

Зато ціла ся трясла. А Ісус ся ку ній озвав ласкаво: дівко, тебе выздравила твоя віра, ідь в покою. Ту є перед нами вопрос: чом Ісус одкрывать тоту жену? Чом єй выставлять понижіню? Коли на іншім місці тым, якых выздравив строго наказовав, жебы были тихо. А ту перед вшыткыма наносить таке понижіня бідній жені, чом тото робить? Одповідь нам давать сама жена: кедь ся лем плаща дотулю, буду здрава. А так Ісус хотів принести хосен з той великой віры той жены, наперед про ню саму. Потім про Яїра, бо пришли з його дому а повіли: уж умерла твоя дівочка. Но Ісус, як тото чув повів: Лем вірь, а буде здрава. А тыж жебы принасти хосен вшыткым нам. Бо хоць было много народа, котрый притисковав Ісуса, но нихто не быв там зо жывов віров, жебы ся го дотулив, але вшытко лем притисковали Ісуса.

Тото є головне напомянутя і про нас: Не притисковати Ісуса нашов участьов лем поверьховов віров або безвіров, але пириступтити так, як тоа жена: кедь ся дотулю, буду здрава. Слава Ісусу Хрісту!

В неділю, 8. децембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. децембра 2024 р. о 12.00 год. і 9. децембра 2024 р. о 2.00 год. за русиньскым часом.