Русиньскы вчены взяли участ в Конвенциі ASEEES в Бостоні

В днях 21.-25. листопада/новембра в Бостоні в Зъєднаных Штатах Америкы проходила шторічна Конвенция ASEEES (Association for Slavic, East European & Eurasian Studies). Взяли в ней участ дослідникы з русиньского світа наукы.

Загалом в тых днях одбыло ся понад 600 ріжных панелів. Серед них были тоты, што тыкали ся русиньскых тем.

Участниками конвенциі были русиньскы вчены – м.ін. з Польщы, Словациі і ЗША. З Польщы участ брали др Марта Ватраль і проф. Олена Дуць-Файфер з Інситуту Східньославяньской Філолоґіі Ягайлоньского Університету. За Інститут Русиньского Языка і Культуры Пряшівского Університету присутны были Зденка Цітрякова, Домініка Новотна і Михал Павлич. Очывидно присутны были і вчены з Америкы, м.ін. проф. Павел Роберт Маґочій.

Карпаторусиньскы темы

В конференциі брало участ близко 3000 участників з цілого світа. Серед панелів нашли ся і тоты, котры тыкали русиньскых тем, нп. панель посвяченый проблематиці нацийонального будительства на Карпатскій Руси. Одбыла ся тіж презентация осягнінь Карпаторусиньского Дослідничого Центра (Carpatho-Rusyn Research Center).

Як інформувал пряшівскій Інститут Русиньского Языка і Культуры, в 56. річнику ASEEES брали участ Зденка Цітрякова, Домініка Новотна і Михал Павлич, якій представил свій реферат на тему русиньской літературы. «Тото, што Інститут Русиньского Языка і Культуры Пряшівского Університету в Пряшові є вынатковым місцьом працы, потверджат тіж дуже заінтересуваня участників подіі його діянями і проєктами. З дакотрыма з них будеме мати змогу видіти ся на 13. річнику Літньой Школы Русиньского Языка і Культуры – Studium Carpatho-Ruthenorum на Пряшівскым Університеті. Красні дякуєме Карпаторусиньскому Дослідничому Центрови за запрошыня», інформувал Інститут.

Лемківскій світ наукы репрезентували дві дослідничкы лемківской літературы. Др Марта Ватраль представляла результаты досліджынь, котры вела в рамках докторской роботы. Єй реферат присвяченый был парадиґмам будительства в лемківскій літературі (а особливо авторскій концепциі «будительского колективу», яку др Ватраль опрацювала в своіх досліджынях), зосереджал ся на двох лемківскых писменниках – В. Хыляку і П. Трохановскым/Мурянці.

Анґлоязычній моноґрафіі проф. Олены Дуць-Файфер пн. «Treading Paths: Lemko Literature in the Years 1848-1918» была посвячена окрема стріча при округлым столі. Четверо американьскых дослідників выповідало ся на тему публикациі, котра є тлумачыньом на аґлицкій язык книжкы пн. «Literatura łemkowska z drugiej połowie XIX i na początku XX wieku» (2001 р.). Стрічу вюл Нік Купеньскій з Академіі Повітряных Сил Зъєднаных Штатів Америкы, а серед дискутуючых были др Богдан Горбаль, лемківскій еміґрацийный діяч, працівник Нюйоркской Публичной Бібліотекы, Аґнєшка Єжык з Вашынґтоньского Університету, Елейн Русинко з Уніврситету в Марилянд і Дейвід Повельсток з Університету в Брандейс.

Інтеґрация представників русиньского світа наукы

Стріча в Бостоні была нагодом не лем брати участ в престіжній Конвенциі ASEEES, але самособом з огляду на присутніст науковців занимаючых ся проблематиком Русинів/Лемків з ріжных части світа – нагодом інтеґрувати ся.

Як реляцийонувала проф. Дуць-Файфер, окрем участи в офіцийных панелях был час на русиньску інтеґрацию. Русиньска «ґрупа» взяла участ в цікавій прогульці по Гарварді. Была тіж спільна вечеря і долгы інтересуючы дискусиі.