Сумар дня на 2. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 2. грудня/децембра 2024 р.

Ден Русинів Польщы

В тым тыжни будеме святкувати Ден Русинів Польщы. Каждого рока 5. грудня/децембра празднуєме наше нацийональне свято для упамятніня віче во Фльоринці з 1918 році, якє пак дало початок Рускій Народній Республиці Лемків. В тым році центральны святкуваня Дня Русинів Польщы одбудут ся в суботу 7. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці о год. 14.30 в долинці при грекокатолицкій церкви. Дальше, як каждого рока, споминовы подіі будут проходити в Рускій Бурсі в Ґорлицях. В рамках музичного проґраму выступлят ансамбль Терочка та Петро Трохановскій, котрый заспіват при акомпаніяменті Ігоря Трохановского. Просиме до спільного святкуваня!

Наукова конференция «Талергоф. Першый лаґєр інтернуваня в Европі»

Ден перше, в пятницю 6. грудня/децембра, в рамках лемківскых упамятнінь 110. річниці інтернуваня Русинів одбуде ся наукова конференция пн. «Талергоф. Першый лаґєр інтернуваня в Европі», на котру просят Стоваришыня «Руска Бурса» в Ґорлицях та Музей Дворы Карвациянів і Ґладышів в Ґорлицях. Подія одбуде ся в Каштели в Шымбарку. Початок о год. 10.30. Конференция має на ціли не лем упамятнити жертвы Талергофу, але тіж выкликати шыршу рефлексию над історичныма механізмами, котры довели до переслідуваня. Проґрам обнимат три темовы панелі. В першым прелеґенты призрят ся ґенезі основаня лаґру на фоні нацийональной політикы Австро-Мадярской Монархіі. В другым панели омовлены будут досвідчыня Талергову з пізнійшыма польскыма лаґрами. Третій панель темово зосередит ся на формах упамятнінь жертв Талергофу і його присутности в русиньскых текстах культуры. Серед запрошеных гости находят ся выдатны бадачы і реґіоналисты, котры представлят ріжны аспекты драматичных подій звязаных з Талергофом і іх влияня на лемківску соспільніст і шыршый історичный контекст Серединно-Східньой Европы. Детальный проґрам конференциі найдете в дописі на нашым портали. Вступне на подію є дармо. Конференция буде тіж нажыво трансмітувана на каналі YouTube lem.fmTV.

Саґа Ґрибів глядат інформаций о Лемках зо старой знимкы

Саґа Ґрибів глядат інформаций о родині Лемків з фотоґрафіі зробленой в часі выселіня в 1947 р. в Ґрибові. Не знятя, як ся называли, ани де жыли перед выгнаньом – знатя лем, же были то Лемкы з околиц Ґрибова, што ждали на депортацию. На нічліг принял іх Ян Свідерскій, Поляк, ґазда з Білой Нижньой, близко ґрибівского желізничного дворця. Не знатя, ци знал ся перше з родином Лемків. Не лишыл ся ниякій слід по іх пізнійшым контакті, коли потягы вывезли іх уж дальше, на захід. Остали лем три фотоґрафіі, єдна перед стодолом Яна Свідерского, котра доднес стоіт в Білій Нижній. Внук Яна, Юзеф Свідерскій передал фотоґрафіі до Саґы Ґрибів, споминаючы, же хотіл бы мати на стодолі дескаль Аркадия Андрейкова з родином Лемків, принятом його дідом в 1947 р. В рамках проєкту «Тихій мемориял – Ґрибівска саґа», завершеным в 2023 р., артиста намалювал 12 муралів і дескалів, в тым єден во Фльоринці, вказуючый лемківскы родины выселены в акциі «Вісла». Саґа Ґрибів хоче підняти ся нового проєкту, в рамках котрого в Білій Нижній буде намалюваный дескаль лемківской родины. Фотоґрафію можете видіти на фейсбуковым сайті Саґы Ґрибів та в днешнім сумарі дня.

Джерело фотоґрафіі: сайт FB Saga Grybów