«Слово» – 23-тя неділя по Сошествії Святого Духа – неділя, 9.00 год.

Ісус в днешнй події выздравліня або ослободжіня чоловіка, котрый находив ся в Ґерґесіньскім краю, опанованого демонами, хоче подати нам великый хосен про нашу безсмертну душу.

Коли Ісус приходить до того края, просто Ґалілеї, де жыв тот опанованый чоловік, тот як Його увидів, приходить і кричіть: Што тобі до нас, Ісусе, Сыну Божый, прошу тя, не муч мене. Тот чоловік ходив нагый, бывав в гробах, повязаный ланцями, вшытко розорвав, і каждый бояв ся ходити тов дорогов. А теперь, коли Ісус приходить, нараз тот чоловік є кроткый, стратила ся вшытка його сила, вшытко страшіня демоньке перебываюче в тім чоловікови. А так нам давать тото слово такой на початку великый хосен.

Коли Ісус робив чудесны діла, Жыды то приписовали Велезевулови, начальникови демонів. А так, коли Жыды отворяють свої скверны уста, жебы зневажовали Хріста, жебы приписовали Божу міць діаволу, де ся допущають гріха проти Святого Духа; так теперь Ісус отворять і проти їх волі уста демонів, жебы самы нехотячі дали свідчіня о Хрістови, словами: што тобі і нам, Ісусе Сыну жывого Бога…

Так самы демоны свідчать і перед апостолами, же нич общого не є меджі нима і Хрістом. Далшый хосен указує нам в тім Хрістос, же тот чоловік перед тым быв каждому страшный, теперь є безсилный в притомности Хріста. То нас учіть, же коли сьме з Хрістом, тогды не мусиме бояти ся ниякой силы неприятеля, бо там переставать вшытка демоньска сила.

Тот чоловік быв нагый, ховав ся в гробах – далшый хосен. Якый? Є образом і геішного чоловіка, котрый ся оддавать нечістоті. Такый выглядавать наготу, такый не мать ганьбы, такый не хоче чути о молитві, о вічности, о суді, о сповіді, о покаяню. Такый не хоче чути ани о кресті, тім знаку побіды над демонами, та ани о самім імені Ісуса. Але такой кричіть: што тобі і мі, Ісусе… Я мам свій жывот. Я сі хочу робити, што хочу. Не муч ня своїма заповідями, обмедженями, страхом зо суду. Тото я чути не хочу. Ідь з країны мойого жывота. Так реаґовали і жытелі того края. Просили го, жебы од них одышов.

Жытелі Самарії, коли жена свідчіть а кличе їх посмотрити на того, котрый мі повів вшытко, што єм поробила, ідуть ку Ісусови а просять: Перебудь з нами. А ту кричать: што тобі до нас, што общого є меджі нами і Тобов, ідь з нашого края. Ту є двояка і наша одповідь на тото Ісусове запрошіня ку правдивій слободі, котру може дати лем Він. Будь є реакція: што тобі і нам, ідь з нашого краю; або перебудь з нами.

Коли буде реакція перша, грішник приїмать одпущіня, демон слабне і тратить ся і приходить до сердця радость і покій. Но, коли одвергне а не прийме, а одосылать Ісуса од себе, тогды перебывать в смерти, а коли приходить тілесна смерть, тогды перебуде у вічній смерти погыбелі. Амінь Слава Ісусу Хрісту!

В неділю, 1. децембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. децембра 2024 р. о 12.00 год. і 2. децембра 2024 р. о 2.00 год. за русиньскым часом.