Сумар дня на 29. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 29. листопада/новембра 2024 р.

Велия Різдва Христового має быти дньом вільным од працы

В середу 27. листопада/новембра тр. польскій Сойм принял закон, згідно з котрым од 2025 рока Велия Різдва Христового (24. грудня/децембра) буде дньом вільным од працы. Устава передвидує, што три неділі попереджаючы Велию будут гандльовы. Тепер законом займе ся Сенат. Рішыня Сойму єст згідне зо становиском выпрацуваным ден перше через получены соймовы комісиі господаркы і розвитку та социяльной політикы і родины. Єдном з пропозиций, котра была порушена підчас дебаты, было установити 24. грудня/децембра дньом вільным од працы коштом інчого, дотля вільного дня – 6. січня/януара. В дебаті появили ся голосы, же рішыня в тій справі повинно брати до увагы ріжнорідніст соспільства і його консеквенциі для вельох громадян. Ден 6. січня/януара, котрый для вельох вірных, святкуючых в старым стилю, єст як раз дньом Велиі Різдва Христового. В звязку з тым принята Соймом новелизация закону, завдякы котрій од 2025 р. велия 24. грудня/децембра буде дньом вілным од працы, єдночасно заховує і Велию 6. січня/януара як ден вільный од працы. Новы переписы мали бы войти в жытя 1. лютого/фебруара 2025 р.

Початок лыжного сезону

В горах рушат лыжный сезон, в тым році вынятково скоро. Од минулого вікенду діют уж лыжны осередкы Солотвины Арена в Креници, ци Мастер-Скі в Тыличы. Заран зимовый сезон зачне ся і на Креницкій Яворині та в дальшым лыжным осередку в Тыличы. До половины грудня/децембра повинны уж діяти вшыткы векшы стациі в реґіоні.

«Од крапкы до твору» в Мазярскій Загороді в Лоси

Припоминаме, што в найблизшу неділю 1. грудня/децембра в Мазярскій Загороді в Лоси будут проходити плястичны варштаты «Од крапкы до твору». Реализуваны сут в рамках векшого проєкту «Крапкы і крискы. Популяризуваня знаня о декоруваню стін в деревяным реґіональным будівництві», котрого орґанізатором є Польскє Людознавче Товариство. Приміры крапко-крискового малярства стрічали ся по цілій Лемковині. Дослідникы реализуючы проєкт фурт глядают в терені захованых хыж, котры сут або были прикрашены тыма мотивами. Кєд дахто хоче поділити ся хоц знимком – прошеный є о контакт: radio@lem.fm.

Варштаты святочных прикрасок в Рускій Бурсі

А уж заран, в суботу 30. листопада/новмебра в Рускій Бурсі в Ґорлцицях одбудут ся варштаты, вчас котрых будеме робити святочны прикраскы. До участи в занятях просиме вшыткых заінтересуваных. Вступне на подію є дармо, запевняме тіж материялы. Початок о 12.00 год. Будут то послідні того рока варштаты з циклю занять веденых в рамках Творчой Бібліотекы в Рускій Бурсі, што фінансуваны завдякы дотациі Міністра Внутрішніх Справ і Адміністрациі, але не послідня заплянувана на тот рік стріча в Бурсі. 7. грудня/децембра одбуде ся Ден Руснів Польщы – початок о 16.00 год., выступлят: ансамбль Терочка та Петро Трохановскій, а 21. грудня/децембра о 15.00 год. обуде ся передріздвяна стріча з прелекцийом др. Юстины Чонсткы-Клапиты на тему колядуваня серед Гуцулів, получена буде з деґустацийом велийных страв і спільным колядуваньом.