Сумар дня на 28. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 28. листопада/новембра 2024 р.

Наукова конференция о траґедиі Талергофу і тым, што было потім

Припоминаме, што 6. грудня/децембра в рамках лемківскых упамятнінь 110. річниці інтернуваня Русинів одбуде ся наукова конференция пн. «Талергоф. Першый лаґєр інтернуваня в Европі», на котру просят Стоваришыня «Руска Бурса» в Ґорлицях та Музей Дворы Карвациянів і Ґладышів. Конференция одбуде ся в Каштели в Шымбарку. Початок о год. 10.30. Конференция має на ціли не лем упамятнити жертвы Талергофу, але тіж выкликати шыршу рефлексию над історичныма механізмами, котры довели до переслідуваня. Серед прелеґентів находят ся выдатны бадачы і реґіоналисты, котры представлят ріжны аспекты драматичных подій звязаных з Талергофом і іх влияня на лемківску соспільніст і шыршый історичный контекст Серединно-Східньой Европы. Детальный проґрам конференциі найдете на нашым портали. Вступне на подію є дармо. Конференция буде тіж нажыво трансмітувана на каналі YouTube lem.fmTV.

Осіннє засіданя Собору ПАПЦ

25. листопада/новембра засідал Собор Єпископів ПАПЦ. Была то осіння сесия Собору. Серед ріжного рода справ православной Церкви розмострено тоты зовнішні, як і внутрішні. В першій черзі підсумувано упамятніня 100. річниці отриманя автокефалиі через ПАПЦ. Серед внутршіх справ православной Церкви в Польщы принято рішыня о тым, штобы взновити працы над канонізацийом православных духовных і світскых, якы были замордуваны в Катыню. Принято справопис зо збіркы на поміч особам по вересньовых зливах. Владыкы вызначыли тіж загальномитрополитарны колекты на потребы поєдных парохій, в тым парохій на Лемковині: в Ждыни, Бодаках, Тыляві і Саноку. На конец рішено м.ін. приняти текст Різдвяного посланя Св. Собору Єпископів до вірных ПАПЦ.

Закінчено ремонт в церкви в Квятони

В минулый понедільок одобрано концерваторскы і реставраторскы роботы, выконаны в грекокатолицкій церкви св. Параскєвы в Квятони. Працы обнимали заінсталюваня модерного протиогньового забезпечыня з системом автоматичного гашыня пожару (тзв. систем FOG). Обєкт поділено на штырі секциі гашыня. З зовни провірено ціліст даху і елевациі церкви, вымінено ґонт. Перед його положыньом доконано імпреґнациі. Вартіст інвестициі вынесла 920 тис. зл, з чого 98% середків походит з фонду Польскій Лад, а дальша част то вклад ґорлицкого повіту. Квятньоска церков в 2013 р. была вписана до списку UNESCO. Окрем квятьоньского храму систем FOG уж од 2006 р. має інча памятка культуры з обшыри ґорлицкого повіту – костел свв. Филипа і Якова в Санковій.

Премєра в Театрі Духновича

В найблизшу суботу, 29. листопада/новембра 2024 р. о 19.00 год. Театр Александра Духновича вкаже на Великій Сцені театру в Пряшові пєсу пн. «Сватання на Гончарівці». Буде то перша премєра той пєсы украіньского прозаіка і драматурґа Григория Квіткы-Основяненка. Днес зачысляна є до класикы. На першый погляд легка комедия о любови одкрыват важны вопросы о рівніст люди, оповідат о родинных односинах, але і о значыню простого людского щестя. Друга премєра пєсы буде 4. грудня/децембра, так само о 19.00 год. На нашым портали доступный є уж проґрам ТАД на місяц груден/децембер – просиме зазерати.