В Суботиці в децембрі почне навчаня русиньского языка

У віторок 19-го новембра 2024-го року в сербскій Суботиці на Основній школі Іван Ґоран Ковачіч одбыла ся святочна подія з нагоды початку навчаня русиньского языка з елементами народной културы. Інформує о тім портал Радіо-Телевізія Войводины.

Школярів і родічів привітали представителі Націоналного совіту Русинів, од котрых ініціатіва вышла, директорка школы, на котрій буде навчаня проходити, як учітелька Мая Доміч, котра буде школярів у Суботиці учіти.

Як повів голова Націоналного совіту Русинів Йоаким Рац, не є легкым быти Русином у змішанім оточіню, но Націоналный совіт і його Одділіня про освіту хоче в тім помочі. „Поможе і наша школа Петро Кузмяк (русиньска школа в Руськім Керестурі, позн. ред.), і нашы учітелі, жебы сьме досягли наш ціль, і тым є, жебы діти научіли ся свій материньскый язык,“ повів Рац.

На русиньскый язык записало ся затля пятьнадцятеро школярів із шестьох основных школ в Суботиці, котры ходять од 2-ой до 8-ой класы. Навчаня буде орґанізоване у єдній ґрупі про вшыткых, і перша година буде 7-го децембра.

Суботиця із своїма майже 89 тісячами жытелів, за остатнім списованьом із 2022-го року, є другым найвекшым містом у Автономній покраїні Войводина, по столиці области – Новім Саді. Єдночасно є найсевернішым містом Сербії, находить ся близко, лем десять кілометрів од граніць із Мадярьском. Суботиця є адміністратівным центром Северобачского округу.

Окрім Сербів за остатнім списованьом жытелі Суботиці ідентіфіковали ся як Мадяры, Хорваты, Бунєвці, Ромы, Югославяны ці Чорногорці. Остатні народности, меджі котрыма суть і Русины, творять лем 2,62 процента населіня міста.

Фото: rtv.rs.