Сумар дня на 15. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 15. листопада/новембра 2024 р.

Головны торжества з нагоды 100-літя автокефалиі Польской Православной Церкви

13. листопада/новембра 1924 р. патріарха Константинополя признал Польскій Православній Церкви автокефалию. Рівно 100 років пізнійше, в середу 13. листопада/новембра 2024 р., в польскій столици одбыли ся головны торжества з нагоды 100-літя юрисдикцийной незалежности православной церкви в Польщы. Святкуваня зачали ся в соборі св. Мариі Магдалины в Варшаві св. Літурійом, котру очелил Митрополита Варшавскій і Цілой Польщы Сава, в асисті членів Святого Собору Єпископів і чысленно прибывшого духовенства. Присутны были представникы Президента Польской Республикы, центральных власти, реґіонального і локального самоуряду, римокатолицкого костела, костелів зосередженых в Польскій Екуменічній Раді, та дальшы гості і вірны. Вечером ювілены торжества перенесли ся до Королівского Замку в Варшаві, де одбыл ся концерт церковной і патріотичной музикы. Выступило шіст хорів: Теолоґічных Шкіл, монастыря в Турковицях, православных мундуровых служб та варшавскых парохій – Агія Софія, св. Йоана Климака на Воли і Катедральный. Підчас концерту акцентувано культурове богатство православной соспільности в Польщы – в лемківскым языку вызвучала пісня в чест священномученика Максима Ґорлицкого, яку написал Петро Трохановскій і згармонізувал Андрий Клинковскій.

Архів Новиця-Прислоп глядат потомных фотоґрафа з Прислопа

Архів Новиця-Прислоп глядат потомных фороґрафа Андрия Галущака з Прислопа в ґміні Устя Рускє. В остатніх роках до архіву трафили три фотоґрафіі з печатком фотоґрафа Андрия Галущака з Прислопа. На жаль, не мают ниякых інформаций о тым фотоґрафі, зато глядают його потомных. Мают надію найти і другы фотоґрафіі його авторства. Кєд дахто має дакы інформациі про Андрия Галущака з Прислопа, прошеный єст о контакт. Деталі находят ся на фейсбоковым сайті Archiwum Nowica-Przysłup.

Ювілейна выстава прац Анны Ґайовой в Пряшові

Вчера в Словацкым Нацийональным Музею – Музею Русиньской Культуры в Пряшові одбыл ся вернісаж выставы прац академіцкой маляркы Анны Ґайовой, звязаный з ювілейом 60. річниці народжыня артисткы. На выставі з назвом «Ослава фантазиі» презентуавны сут образы і ілюстрациі з простору дотеперішнього творчого періоду артисткы. Анна Ґайова (нар. 1964 в Пряшові) в своім творчым жытю мала уж парудесят індивідуальных і колективных выстав в цілій Европі. Попри малярстві і ґрафіці, занимат ся тіж ілюструваньом друкуваных выдань, м.ін. русиньскых книжок, букварів і підручників до вчыня русиньского языка. Выставу мож обзерати до 31. грудня/децембра тр.

«Лемкы в Центрі» – подія в Любіні

Днес і заран в Любіні буде проходила подія з назвом «Лемкы в Центрі». Орґанізаторами сут Центр Творчых Діянь в Любіні, Любіньскій Повіт і Православна Парохія Святой Тройці в Любіні. Дводньовый проґрам одбуде ся в Центрі Творчых Діянь в Любіні, днес і суботу од 17.00 год. Будут концерты, прелекциі, выстава, не бракне і деґустациі лемківской кухні. Другого дня акциі концерт даст Лемківскій Ансамбль Пісні і Танця «Ластівочка». Подія буде получена зо святкуваньом 100 річниці отриманя Польском Правнославном Церквом автокефалиі. З той нагоды буде мож выслухати прелекций звязаных з історийом православія в Польщы та одбуде ся вернісаж выставы пн. «Ікона в Центрі».