Парохія в Самбожу святкувала 70-літя

Єдна з лемківскых парохій на західніх землях святкувала своє 70-літя. В неділю, 10. листопада/новембра торжественном Божеском Літургійом упамятнено річницю возникніня православной парохіі св. Параскєвы в Самбожу (поль. Samborz) на Нижнім Шлеску.

Істория самборской парохіі стисло є повязана з дольом лемківского народу – выселеныма в рамках Акциі «Вісла» перед 77 роками. Парохія єднако завязала ся дакус пізнійше, бо офіцийно в 1954 р.

Великій ювілей невеликой парохіі

Святочну Літургію з благословліня владыкы Юрия, архієпископа вроцлавско-щеціньской єпархіі ПАПЦ, в склад котрой входит парохія, одслужыли парох – о. Ігор Габура, о. Артем Лобода і діакон Даміян Лучковец. Святкувати ювілей парохіі зышли ся не лем місцевы вірны, але чысленно і з другых місцевости. Співал хор під диреґентуром Надіі Базовкін. По завершыню Літургіі одбыл ся крестный хід.

О. Ігор Габура од імене парохіяльной спільноты дякувал вшыткым за прибытя. Переказал желаня од архієпископа Юрия, якій з причыны державных подій Свята Незалежности Польской Республикы не зміг особисто в тот ден быти в Самбожу. Парохіяне поздоровили о. Габуру з нагоды ювілею 10-літя його служыня в Самбожу та так само припадаючого 10-літя священства.

Свята Параскєва

Початкы самборской парохіі то 1952 р., коли парох в Єленій Горі і адміністратор парохіі в Мальчыцях, о. Штефан Бігун, поінформувал товдышнього митрополиту Варшавского і цілой Польщы Макария, што в Самбожу і сусідніх селах є вельо Лемків, якы нашли ся гын в наслідстві Акциі «Вісла», а якы не мают свойой церкви.

Товды зачали ся стараня о місце і отриманя позволіня власти на одправляня богослужынь. По двох роках, 15. січня/януара 1954 р. Уряд до Справ Віроісповідань передал православным євангелицку каплицю, находячу ся в забудові палацику в Самбожу. З документів Уряду выходит, што была то «домашня каплиця при ПҐР (пол. PGR), о двоіх дверьох і трьох здекомплетуваных выглядах, всередині поступмент престолу з образом частично здевастуваным». Стараньом вірных каплицю скоро одремонтували, так штобы могла служыти на потребы православных богослужынь.

Церков отримала покровительство св. Параскєвы – більшіст вірных походила з Чырной, де церков была під такым же покровительством. Но, до Самбожа приналежали вірны выселенці з Чырной і з другых сел на Лемковині.

Перша Божеска Літургія была одправлена 7. квітня/апріля 1954 р. Служыл єй о. Штефан Бігун, якій перше нюс душпастырску опіку во Фльоринці.

В 2018 р. была посвячена нова церков – під покровом св. Параскєвы. В іконостасі поміщено образ лемківского святого – священномученика Максима Ґорлицкого.

фот. diecezjawroclawsko-szczecinska.pl