Вертат Обзерач Природы. О чым буде першый одтинок новой сериі?

Долго єм казал Вам ждати, бо аж близко 3 рокы, на поворот новых одтинків Обзерача Природы. Вкінци вертат Ваш улюбленый природничый проґрам – в клясичній формі, але з новыма темами.

Припомнийме лем, же Обзерач Природы то авдиция тыкаюча всякых інтересуючых чудес природы, якы можеме обзерати так на близкій нам Лемковині, як і в дальшых закутинах світа. Будеме вандрувати бескідскыма лісами, присмотювати ся пісковцьовым скалам, прібувати воду з карстовых джерел ци купати ся в озерах.

На початок новой сериі проґрамів возму Вас на сам конец Бєщадів – до Тарнавы Выжньой. В тій части гір, де давнійше жыли Бойкы, одкрыєме правдивый торфяник – і то такій звычайный! Барз рідко мож найти місця выглядаючы так еґзотичні як тото. Торфяник в Тарнаві Выжній жде на вандрівників, котры можут гев ходити по лавках, смотріти на сосновый ліс і чути ся як на далекій пілночы Европы.

Чом такє місце находит ся як раз в Бєщадах? Як там доіхати? Што докладні жде нас на місци? Слухайте першого одтинка новой сериі Обзерача Природы в найблизшу пятницю, 8. листопада/новембра, о 13.00 год. Одтинок буде повтаряный в суботу, 9. листопада/новембра о 7.00 год. і в віторок 12. листопада/новембра о год. 15.15. До стрічы на (радийовым) шляку!