Сумар дня на 4. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 4. листопада/новембра 2024 р.

Крениця вкінци перейме і змодернізує желізничний дворец

Правдоподібно на початку 2025 р. ґміна Крениця вкінци перейме желізничный дворец в Креници. Інформувал о тым в остатніх днях бургомайстер Крениці Пьотр Рыба. Підписаны были уж вшыткы протоколы і власти ждут уж лем на корпорацийны згоды PKP – Польскых Державных Желізниц. Додатково Крениця отримала на перебудову дворця вступну промесу в квоті 3,5 млн злотых з Урядового Проґраму Одбудовы Забытків. Модернізацийны працы плянуют зачати уж в будучым році. Ґміна Крениця уж од долшого часу плянувала выкупити і змодернізувати будинок дворця PKP. Подля вступного пляну заґаздуваня част будинку буде служыла подорожным, а част місто перезначыт на другы функциі, в тым культурову діяльніст. Креницкій дворец находит ся в реґістрі забытків, зато захованый буде його старый выгляд, заґаздуваный буде тіж терен докола будинку.

З креницкого шпыталя будут літати гелікоптеры

Модернізация желізничного дворця то не єдина інвестиция звязана з транспортом, яка буде реализувана в найблизшым часі в Креници. До кінця того рока має быти готовый проєкт геліпаду в Креници. Власти новосандецкого повіту рішыли побудувати геліпад близко креницкого шпыталя. З геліпаду буде корысталa Авіяцийна Ратівнича Служба. Крениця притігат великє чысло туристів, зато транспорт пошкодуваных може быти часами утрудненый. Геліпад поможе усправнити комунікацию. Згідно з новыма вымогами, котры будут обовязувати од 1. січня/януара 2025 р., такій геліпад повинен ся находити не дальше як 5 минут ізды автом од шпыталя – амбулянсом буде то около 1,5 минуты. Повітова ділянка, на котрій плянувана єст інвестиция, находит ся в одлеглости 1 км од шпытaля, што значыт, же сполнят вымогы новой уставы. Як подал староста новосандецкого повіту Тадеуш Заремба, оголошеный был конкурс оферт на проєктове поступуваня, а концепция запропонувана найтуньшом фірмом была затверджена. Проєкт мал бы быти готовый до кінця того рока, а о дакілько місяців повинны быти уж вшыткы позволіня. Кошт будовы геліпаду в Креници был выціненый на близко 2,5 млн злотых.

«Ровером через погранича»

Іщы через нелілы два тыжні мож взяти участ в роверовым райді «Ровером через погранича». То уж четверта едиция радийу, орґанізуваного Маґурскым Нацийональным Парком. Так як в попередніх роках, райд зачал ся в жолтни/октобрі і закінчыт в листопаді/новембрі. Не змінила ся тіж і формула конкурсу. В рамках райду треба переіхати індивідуально або в ґрупі єдну з вызначеных орґанізатором трас. Для першых двостох участників, котры сполнят вымаганя поміщены в реґуляміні, сут передвиджены нагороды. Пропонуваны стежкы переізду находят ся не лем на обшыри Парку, але тіж і в сусідуючых ґмінах та в околици села Нижня Полянка на Словациі. Того рока райдовы трасы нашли ся тіж і на пілнічній страні Парку. На вызначеных трасах находят ся такы пункты як цмонтері в Свіржові Рускій, Жыдівскым, Незнайовій, церкви в: Котани, Святковій Малій, Святковій Великій, Полянах, Гыровій, Розділю, Перегримці, Выжній Полянці, макєта церкви в Нижній Полянці, ци придорожны капличкы і кресты. Список трас та реґулямін райду находят ся на сайті Маґурского Нацийонального Парку. Райд потырват іщы до 15. листопада/новембра тр.