Сумар дня на 31. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 31. жолтня/октобра 2024 р.

Ґорлицка конференция о істориі ПАПЦ

29. жолтня/октобра в сали Осередка Православной Культуры «Ельпіс» в Ґорлицях одбыла ся наукова конференция пн. «Одроджены з Польском Республиком», котра вписала ся в гармоноґрам подій звязаных з упамятнінями 100. річниці отриманя Православном Церквом в Польщы автокефалиі. Почестне покровительство над дводньовом науковом симпозийом обнял Президент Польской Респубилкы Анджей Дуда. Першый ден конференциі был 28. жолтня/октобра в Ряшові. Од імени орґанізатора присутных привитал о. митр. др Роман Дубец. В тему конференциі ввюл владыка Паісий. Прелеґентами были м.ін. o. прот. др Адам Маґрук, Євген Чыквін, політик і журналиста, бывшый посол, владыка Паісий, Анна Радзюкєвич, редакторка «Православного Перегляду», др габ. Томаш Слюсарчык, о. Штефан Шак з Пряшівского Університету і о. митр. др Роман Дубец, якій шырше представил процес одроджуваня Православной Церкви на Лемковині в меджевоєнным періоді. Більше на тему конференциі чытайте на нашым портали.

Ближыт ся премєра оперы «Голос»

Припоминаме, што уж 24. листопада/новембра в Нацийональным Форум Музикы во Вроцлаві одбуде ся премєра лемківской оперы «Голос». То проєкт композиторкы Дариі Кузяк, якій лучyт в собі сучасну музику з лемківском народном музиком і електроніком. Опера оповідат про дві сестры, котры розділила доля, а туга пхат іх в свою страну. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Разом в творіню лемківской оперы возме участ близко 60 осіб. Фурт можете підперти колекту на сайті zrzutka.pl. Пробы до премєры уж тырвают. Внет буде мож придбаты білеты на подію.

Новый статут Рады про нацийональны меншыны

Компетенциі і аґенду дотеперішнього Выбору про нацийональны меншыны і етнічны ґрупы, котрый належал під Раду Влады Словацкой Республикы про людскы права, нацийональны меншыны і родову рівніст, возме під себе по новому Рада Влады Словацкой Республикы про нацийональны меншыны. Выходит тото зо статуту рады, якій управлює єй задачы і компетенциі як окремого фахового орґану влады. Статут рады схвалили словацкы власти на своім засіданю в середу 30. жолтня/октобра. Нова Рада буде порадным орґаном словацкых власти. Подля статуту буде полнила функцию консультацийного орґану. Так само рада має брати участ в координациі публичных політик, концепций і стратеґій державы в обшыри прав нацийональных меншын. Председом Рады є председа влады Словацкой Республикы, значыт премєр. Посада підпредседы є для полномічного влады СР про нацийональны меншыны. Тепер Русины мают трьох представників в Раді. Подля нового статуту засіданя рады мали бы ся одбывати што наймшеньше два разы до рока.

Выстава творів Анны Ґайовой

Словацкій Нацийональный Музей – Музей Русиньской Культуры в Пряшові рыхтує выставу робіт академічной маляркы Анны Ґайовой – «Ослава фантазиі» з нагоды єй жывотного ювілею. Вернісаж выставы одбуде ся 14. листопада/новембра о 16.00 год. Куратором выставы є Растислав Мравец. Вказаны будут образы і ілюстрациі з простору дотеперішнього творчого періоду артисткы.