Русины з Чеськой републікы гуманітарно поможуть воякам із Підкарпатя

Общество приятелів Підкарпатьской Руси звернуло ся на своїм офіціалнім сайті до своїх членів і вшыткых прихыльників і підтримователів із просьбов о поміч.

Як общество інформовало, кінцьом октобра 2024-го року вєдно із орґанізаційов Приятелі Підкарпатьской Руси з Бырна хотять одвезти гуманітарну поміч на Підкарпатя. Зато общество просить о фінанчну підтримку.

В рамках гуманітатной помочі хотять тоты дві орґанізації привезти на Підкарпатя здравотницькый матеріал, наприклад гемостатікы ітд. Тот пак має быти переданый воєньскым одділам, в котрых моментално служать вояци, якы походять із Підкарпатя. Общество на своїм сайті публіковало і банковый рахунок, на котрый мож пожертвовати грошы.

„І наймнеша поміч є вітана, дякуєме вшыткым, котры вырішать загнати будьяку суму. Не будьме апатічны ку чуджому нещастю,“ пише общество.

Общество приятелів Підкарпатьской Руси было основане у 1990-ім році і діє в Чеській републіці. Общество є членьсков орґанізаційов Світового конґресу Русинів за Чеську републіку, і было єдным із основателів конґресу.

Ідейно одкликує ся на діятельность Клубу приятелів Підкарпатьской Руси, котрый быв основаный в меджівойновім періоді в Братіславі. Цілями общества суть проглубованя односин із жытелями і орґанізаціями Закарпатьской области Україны, бывшой Підкарпатьской Руси, підпора Русинів на теріторії Чеськой републікы ці популарізація Русинів в Чеській Републіці. Общество выдавать і часопис Podkarpatská Rus, но і далшы неперіодічны публікації.

Членами общества суть Русины, Чехы народжены на теріторії Підкарпатьской Руси і далшы люди, котры мають одношіня ку тій теріторії.

Жрідло фотоґрафії: Pixabay.com.