Функцийонуваня Парків без таємиц. Маш звіданя? Воз участ в анкєті!

Загальнопольскє Товариство Охороны Птахів припоминат, што дальше мож выполнити анкєту на тему функцийонуваня Нацийональных Парків.

Нацийональны Паркы, котры сут найвысшом формом охороны, занимают коло 1% Польщы. Як вказали досліджыня ведены Загальнопольскым Товариством Охороны Птахів, діяльніст парків не єст так очывидна ани транспарентна для жытелів прожываючых в околици парків, як повинна быти.

Присутніст той формы охороны природы то заєдно можливости, як і ограничыня для локальной спільноты. Треба єднак добрі познати форму діяня парку. Окрем загальных уставовых реґуляций функцийонуваня, каждый з нацийональных парків має своі особливы принципы, котры ріжнят ся медже парками. Тото, што в єдным єст заборонене, в інчым може быти дозволене. Не чудне, што дальше являют ся недогваріня і вантпливости на тему функцийонуваня парків.

Напроти тому проблемови вышло Загальнопольскє Товариство Охороны Птахів, котре зрыхтувало на своім сайті анкєту на тему веденой парками діяльности, особливо Маґурского і Бєщадского. Аркуш не ограничат ся єднак лем до тых двох обшыри, бо мож тіж задати загальне звіданя о діяльніст парків в Польщы, охорону природы ци передати своі вантпливости. З причыны того, што Маґурскій і Бєщадскій Паркы сут головном темом анкєты, анкєта особливо кєрувана єст до мешканців прожываючых в сусідстві обох Парків, як і одвиджаючых тоты околиці туристів. На основі звідань і коментарів переданых до кінця жолтня/октобра Товариство зрыхтує одповіди і перешле іх до заінтересуваных осіб. Додатково, пересланы темы будут дискутуваны в часі інтернетовой стрічы.