Катедралный собор в Пармі перенесеный. Храм може служыти на несакралны цілі

В неділю 6-го октобра 2024-го року віруючі і священици Пармской єпархії вєдно із своїм владыком – Преосвященым Робертом Піптом, послідній раз стрітили ся на архієрейскій літурґії в Катедралнім соборі святого Йоана Крестителя в Пармі, в штаті Огайо, США.

О день пізніше были выданы два офіціалны декреты підписаны пармскым єпархом. Першый рішыть, же дотеперішній парохіалный Храм Святого Духа в Пармі став новым катедралынм собором з тым, же мінить свою назву на Катедралный собор Святого Йоана Крестителя.

Другый інформує о тім, же старый катедралный собор быв одсвяченый і може служыти на несакралны, но не нечісты (неморалны позн. ред.) цілі.

Пармска єпархія належыть під Піттбурзьску ґрекокатолицьку митрополію – русиньску церьков sui iuris (свого права) в США, і выникла у 1969-ім році. Одвтогды быв і Храм святого Йоана Крестителя катедралов. Його будованя было докінчене в 1960-ім році.

Інформація пришла уж в авґусті

Інформація о тім, же катедралный собор буде запертый і перенесеный, пришла уж в авґусті. Офіцлано о тім втогды інформовав владыка Роберт Піпта. 17-го авґуста ку тій темі выдав своє пастырьске писмо.

„Із надійов наповненов молитвов і візійов на звекшіня потенціалу нашой єпархії про роснутя і євангелизацію оголошам вам перенесіня Катедралного собору святого Йоана Крестителя на розі уліць Бродвю і Снов Ровдс в Пармі, Огайо, до Храму Святого Духа,“ інформовав втогды владыка.

Так само підкреслив, же зробити так важный крок вырішыв по конзултації з Пресвитерьсков радов, Колеґійов конзулторів Пармской єпархії і по выслуханю далшых священиків єпархії, як і віруючіх лаіків.

Владыка Піпта уж втогды інформовав і о тім, же на то має єпархія дозволіня од Святішого Престола, кедьже перенесіня катедралного собору схвалила і Дікастерія про восточны церькви, што дістав на писмі пару днів перед выданьом свого пастырьского листу.

Зміну може допроводити і смуток

То, же перенесіня катедралного собору не быв легкый крок, не крыє єпархія в офіціціалных документах ці выголошінях, котры ку тій темі были выданы. Но так само акцентує, же то быв потрібный, выжаданый крок.

„З дозволіньом Святішого Престола в Римі быв Храм Святого Духа в Пармі, Огайо, підвышеный на новый статус катедралы нашой єпархії, і переменованый на Катедралный собор святого Йоана Крестителя,“ пише ся в оголошіню, котре інформує о планах на перебудову нового собору.

„Веце обставин, котры появляли ся і розвивали почас років, выжадали собі тото перенесіня,“ дочітаме ся далше з тым, же такы зміны в різній мірі може допроводити і смуток.

„Но перенесіня нашой новой катедралы і єпархіалного центра представлює намагы о одважну, євангелизачну, творчу і візіонарьску харізму, котра основала Пармску єпархію, і все была самов душов нашой єпархії.“

В тексті ся так само дочітаме, же Пармска єпархія все была місійнов, а якраз зато і теперь было потрібне зробити таку зміну, жебы тото посланя Пармска єпархія не стратила. Приоминать ся і то, же єпархія окрім іншого стратила часть свойой теріторії, кедь в у 1981-ім році одділіньом выникла Єпархія Ван Нуйс, днешня Єпархія Фінікс.

Реконштрукційов приголосять ся ку русиньскым коріням

Новый Катедралный собор святого Йоана Крестителя, дотеперішній Храм Святого Духа в Пармі, перейде змінами. Єпархія одкликує ся в офіціалнім выголошіню ку реконштрукції катедралы на русиньске походжіня свойой церькви, а вєдно з тым хоче мінити інтерьєр і екстерьер катедралы.

„Освновый приступ ку екстерьєру нашой новой катедралы іншпірує ся гуцульсков архітектуров середньой і выходной Европы, з котрой походить Русиньска візантійска католицька церьков. Такым способом буде дізайн нашой катедралы унікатным меджі восточныма католицькыма катедралами в Америці, і буде свідоцтвом, котре оддає честь коріням нашой церькви,“ дочітаме ся на офіціалнім сайті єпархії.

„І кедь є перенесіня і редізайн катедралного собору вызначным ділом, є лем частьов новой еры, котра почінать в Пармскій єпархії.“

Жрідло фотоґрафій: Facebook/Eparchy of Parma.