Сумар дня на 14. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 14. жолтня/октобра 2024 р.

За нами ХІІ Бієнале Лемківской / Русиньской Культуры

В минулый вікенд в Креници одбыло ся ХІІ Бієнале Лемківской / Русиньской Культуры, якого орґанізатором єст Стоваришыня Лемків. На подіі, яка проходит што два рокы, стірчают ся в Креници родакы з ріжных держав. Проґрам традицийно зачал ся молитвом над гробом Епіфана Дровняка – Никыфора. Квітя на гробі положыли Председа Світовой Рады Русинів Штефан Лявинец і члены Рады. Пак квітя было зложене і при Памятнику Никыфора на креницкым дептаку. Одтамале участникы рушыли святочным короводом веденым лемківскым Ансамбльом Пісні і Танця «Ластівочка», аж до Старого Здройового Дому, в бальовій сали котрого проходил культурный проґрам. Офіцияльно одкрыл Бієнале выступ дітячого ансамблю Руской Бурскы в Ґорлицях Терочка. В проґрамі тогорічного свята были аж три концерты, в котрых запрезентували ся русиньскы ансамблі з Польщы і заграниці. Окрем того было одкрытя выстав і дискусия на тему стану лемківской / русиньской культуры, а додатково одбыла ся стріча творців в рамках ХХХІІ Лемківской Творчой Осени. Была і торжественна част, в часі котрой вручаны были нагороды. В тым році лавреатом Преміі Василя Турока-Гетеша остал проф. Михайло Фейса. Проф. Михайло Фейса є автором, тлумачом, лінґвістом і культурным діячом Русинів в Войводині. На університеті в Новым Саді передає русиньскій язык і літературу. Єст головом Руской Маткы, членьской орґанізациі Світового Конґресу Русинів, а тіж єст членом Світовой Рады Русинів за Сербію.

Прошла ХХХІІ Лемківска Творча Осін

Так само в минулый вікенд одбыла ся ХХХІІ Лемківска Творча Осін. Того рока подія была посвячена 110. річници страдань Лемків в концентрацийным лаґрі в Талергофі. Першый ден Творчой Осени проходил в Креници. В стрічы взали участ Русины і гості з Польщы і заграниці, м.ін. Петро Мурянка, Олена Дуць-Файфер, Павел Коробчак, Адам Томашук з Підляша, Людмила Шандальова і Петро Медвід зо Словациі, Мариянна Лавинец з Мадяр і Наталия Гнатко з Хорвациі. Другій ден Творчой Осени проходил в Ґорлицях, в просторах Руской Бурсы. В рамках подіі одбыл ся вернісаж фотоґрафічной выставы «Материя памяти», авторства Ядвіґы Яновской та Хрістофера Мысько. Два рокы реченый артистичный дует працувал в долині села Незнайова. Выстава порушат тему достоменности, памяти і істориі. Артисты замірили ся зробити коляж памяти, котра минула, хоц привидні єст присутна в історичных записах, списаных фактах і, як подают: «факты сут єднак сухы, не трафляют до головы так, як образ».

Днес святкує ждыньска православна парохія

Днес подля старого календаря святкуваный єст ден Покровы Пресвятой Богородиці. На Лемковині єст то ден парохіяльного свята м.ін. в православній церкви в Ждыни. До участи в кєрмешы запросил вірных парох о. Ярослав Ґрич. Вчера, в велию свята Покровы Пресвятой Богородиці была в Ждыни правлена Велика Вечырня з Літийом. Святочна служба божа днес о 10.00 год.

Концерт з нагоды округлого ювілею Шамбрінців

В найблизшу суботу 19. жолтня/октобра 10. річницю істнуваня одсвяткує русиньскій ансамбль Шамбрінці. Святочный концерт одбуде ся в Домі Культуры в Старій Любовни. Окрем Шамбрінців запрезентуют ся і гості: Вербунк, Пастрноці і Русиньскє Тріо. Концерт зачне ся о 18.00 год. Білеты на концерт мож купити в Домі Культуры в Старій Любовни. Подія пройде в рамках проєкту Русины Старой Любовні.