Сумар дня на 7. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 7. жолтня/октобра 2024 р.

Упамятніня 110. річниці інтернуваня Русинів

Лемківска спільнота просит до участи в упамятнінях 110. річниці інтернуваня Русинів в концетрацийным лаґрі в Талегофі в Австриі. В проґрамі упамятнінь єст зложыня квітя під Талергофскыма Крестами на Лемковині, м.ін. в Бортным, Перегримці, Тыличы і Чорным, в днях од 10. до 13. жолтня/октобра. В днях 18.-19. жолтня/октобра одбуде ся общелемківскє поломництво до Талергофу, орґанізуване Талергофскым Комітетом. В проґрамі сут м.ін. Божественна Літургія в Фельдкірхен бай Ґрац, панахіда на місци спочынку жертв лаґру на цмонтері в Фельдкірхен, культурный проґрам і упамятніня лемківскых жертв. Выізд єст плянуваный з участю грекокатолицкого і православного духовенства. Дальше, 6. грудня/децембра тр. в Конференцийно-Выставенничым Осередку «Каштель» в Шымбарку одбуде ся наукова конференция пн. «Талергоф. Першый лаґєр інтернуваня в Европі». Єй орґанізатором єст Стоваришыня «Руска Бурса» в Ґорлицях. Цілю конференциі єст презентация і популяризация стану бадань, котры односят ся до обшыри звязаных з історийом і пізнійшым влияньом австрийского лаґру інтернуваня в Талергофі. Увязнено в ним парунадцет тисячів Русинів – в тым значучу част лемківской інтеліґенциі. В конференциі прелеґентами будут експерты, котры репрезентуют ріжны науковы обшыри. Конференция буде онляйново трансмітувана.

ХІІ Бієнале Лемківской/Русиньской Культуры

Як інформує Стоваришыня Лемків, уж в найближшый вікенд 12.-13. жолтня/октобра в Креници одбуде ся ХІІ Бієнале Лемківской/Русиньской Культуры. Подія традицийно зачне ся панахідом над гробом Епіфана Дровняка – Никыфора о 12.00 год, а пак зложене буде квітя при Памятнику Никыфора в центрі Крениці. О 15.00 пройде одкрытя выстав і першый концерт, в котрым запрезентує ся лемківскій Ансамбль Пісні і Танця Ластівочка і гості. О год. 18.30 буде другій концерт з участю ансамблів з Польщы і заграниці. Наконец дня, о 20.00 год. пройде стріча творців в рамках ХХХІІ Лемківской Творчой Осени. В неділю од 9.00 год. буде проходила дискусия на тему стану лемківской/русиньской культуры, а о 15.00 год. одбуде ся третій концерт з участю ансамблів з Польщы і заграниці. Акциі будут проходити в просторах Старого Здройового Дому В Креници. Подія буде зреализувана завдякы дотациі Міністра Внутрішніх Справ і Адміністрациі та Уряду Міста і Ґміны Крениця.

Необхідны зміны переписів тыкаючых вчыня меншыновых языків

Початком минулого місяця омбудсман Марцін Вьонцек выстосувал писмо до міністер едукациі Барбары Новацкой. Апелює в ним до Міністерства Нацийональной Едукациі о необхідности зміны переписів, котры односят ся до вчыня языків нацийональных і етнічных меншын. Одмінніст інтерпретаций в переписах і орґанізацийны проблемы, котры тыкают вчыня в публичных школах, выкликуют непевніст серед учеників і іх родичів. Подля омбудсмана, необхідны сут правны зміны, котры заґарантуют меншынам полну реализацию іх прав в обшыри едукациі. Веце на тоту тему прочытате в дописі на нашым портали.

Креницкы радны підняли резолюцию тыкаючу закупу желізничного дворця

Як інформує бургомайстер Крениці Пьотр Рыба, до кінця січня/януара будучого рока желізнична стация в Креници повинна уж быти власністю міста і курортной ґміны. Радны підняли уж резолюцию тыкаючу закупу дворця, котрый має коштувати близко 2 млн злотых. Роботы при модернізациі будинку мали бы рушыти уж в будучым році.