Якостнішы драгы в словацько-польскім пригранічу

Польско-словацьке приграніча в околіці Дуклі і Выходных Карпат будуть капчати выновлены драгы. Як інформовало Одділіня комунікації Пряшівского самосправного краю (ПСК), край в тых днях почінать вызначны ставебны акції за 3,5 міліона евр.

ПСК собі при обновліню драг в окресах Стропків і Свідник поможе европскыма фінанціями із проґраму Interreg.

Новый асфалт буде од села Ладомирова, Свідницького окресу, аж по граніцю з Польщов, і на трасі Мала Поляна – Гавай, Стропківского окресу. ПСК може черьпати на тоты драгы фінанції із проґраму Interreg вдяка польско-словацькій співпраці.

В рамках реконштрукції драгы в окресі Свідник буде обновленый і міст в екстравілані села Шеметківці, оправлять ся заставковы нікы  в селі, ці нівелета вышкы драгы за селом Ваґринець. Драга меджі Малов Полянов і Гавайом перейде комплекснов реконштрукційов.

„Реалізаційов споминаных інвестічных акцій зліпшыть ся комфорт участників драгового транспорту на предметных комунікаціях, скоротить ся час переїзду, і підвышыть безпечность на дразі, пише Одділіня комунікації ПСК. Єдночасно зліпшать ся условії драгового транспорту про жытелів обидвох окресів – Стропків і Свідник.