Сумар дня на 23. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 23. вересня/септембра 2024 р.

Реґулямін набору оферт на меншыновы задачы

Міністер Внутрішніх Справ і Адміністрациі затвердил в пятницю 20. вересня/септембра Реґулямін набору оферт на реализацию в 2025 р. задач маючых на ціли охорону, захованя і розвиток культуровой достоменности нацийональных і етнічных меншын або захованя і розвиток реґіонального языка. Оферты на реализацию публичных задач мож складати до 4. листопада/новембра для цільовых дотаций і до 21. жолтня/октобра для підметовых. Оферты сут складаны лем в електронічній формі. Реґулямін набору оферт єст опубликуваный в офіцияльным сервісі Польской Республикы в катеґориі Нацийональны і Етнічны Меншыны.

В Стащыні бесідували о заряджаню культурном спадковином І світовой войны

В минулый четвер 19. вересня/септембра в Стащыні, сниньского окресу проходили вартшаты, на котрых бесідувано о дідовизні першой світовой войны на териториі Нацийонального Парку Полонины і пілнічно-східньой Словациі. Цілю подіі было злучыти самосправы, державны інституциі і позаурадовы орґанізациі, жебы дискутували о ефективным заряджаню том культурном спадковином. Орґанізатором подіі была Справа Нацийонального Парку Полонины. Проєкт GOV4PeaCE є заміряный на створіня соспільной черезграничной візиі про заряджаня культурном дідовизном воєнных діянь першой світовой войны. Обнимат тестуваня новых приступів до дізайну музеів, творіня черезграничных трас і підпору меджесекторовой спілпрацы. Проєкт єст реализуваный од мая тр. до жолтня/октобра 2026 р. і має партнерів в шестьох державах. Веце на тоту тему прочытате в дописі на нашым портали.

«100-літя Автокефалиі» – выстава во Вроцлаві

Як поінформувала в минулым тыжни Православна Вроцлавско-Щеціньска Єпархія, на вроцлавскым Рынку станула выстава пн. «100-літя Автокефалиі». На 20 таблицях вказано історию Православія в Польщы, з особливым увзглядніньом меджевоєнного періоду, часу намагань отримати автокефалию. Выстава вказує ключовы особы і подіі звязаны з процесом отриманя автокефалиі Польском Церквом. Запрезентуваны сут і інчы аспекты церковного жытя тамтого періоду, м.ін. повстаня і діяльніст войскового душпастырства. Выставу мож обзерати на Рынку во Вроцлаві до четверга 26. вересня/септембра тр.

Рушают осінні акциі вакцинациі лишок

В минылым тыжни на Підкарпатю рушыла осіння акция вакцинациі лишок. В Малопольщы така акция рушыт в найблизшу пятницю 27. вересня/септембра. Інфорумували о тым Воєвідскы Лікарі Ветеринариі. В обох воєвідствах вакцинация лишок проти встеклині потырват до 4. жолтня/октобра. Вакцина буде метана з аероплянів і выкладана ручні, має форму бронзового диску або кубика, з притігаючым звірята запахом. Треба памятати, же кєд найдеме таку вакцину, не мож єй дотыкати. В часі тырваня акциі вакцинациі лишок і через 14 дни по єй завершыню, тє. до 18. жолтня/октобра вкючно, не мож выпущати без опікы псів і котів, а в часі прогульок псы мусят быти на мотузку і в наморднику. Цілю успішного і безпечного проведіня вакцинациі лікарі просят жытелів о достосуваня ся до рекомендаций, а родичів і опікунів о переданя тых інформаций дітям. Комунікаты находят ся на офіцияльных інтернетовых сайтах воєвідскых інспекторатів ветеринариі.