Сумар дня на 20. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 20. вересня/септембра 2024 р.

Зміны в словавкым меншыновым фонді

Словацкій меншыновый фонд буде мал алокованых 8,8 мілийона евро на рік. Выходит то з новелизациі Закону о Фонді на підпору культуры нацийональныц меншын, котру в минулый віторок 17. вересня/септембра схвалили депутаты Нацийональной Рады Словацкой Республикы. Фонд буде мал о піл мілийона евро веце як дотля, што є повязане з тым, же Словация признала влони дальшу, уж штырнацету, вєтнамску нацийональну меншыну. Новелизация принесла і зміну чысла членів Справной Рады Фонду на підпору культуры нацийональных меншын – дотля было іх 15, а подля новелизациі буде іх о двоє веце. В припадку Русинів – по новелизациі не будут мати менше грошів, але будут мати менше процентово з розрахунку фонду, хоц подля даных зо списувань іх чысло од 2011 до 2021 рока наросло з 33 482 на 63 556 осіб. Веце про новелизацию закону о фонді прочытате в дописі на нашым портали.

Нова туристична атракция в Креници

В тым тыжни рушыла будова новой видоковой вежы в Креници. Буде ся она находила на верху Парковой Горы. Констукция буде мала вінду і шкляный видоковый тарас. Видоковый пункт буде ся находил на высокости 36 м і буде мож з него обзерати краєвиды Крениці і Бескіду разом з Креницком Яворином, а аж і Татры. При вежы буде зелена зона одпочынку. Част інвестициі будує ся на ґмінных ділянках, котры Крениця даст в аренду Польскым Кабельным Желізницям PKL на 30 років. Так само на ґмінным ґрунті ниже верха Парковой Горы PKL будуют Поляну Музикы і Світла. Буде то атракция в стилю ретро, навязуюча до символикы Крениці – найдут ся там різбы з рослин вказуючы знаны особы курорту і Крениці. В загороді найдут ся тіж різбы з квітя в формі інструментів, з котрых звучала буде музика ретро. Креницкій самоуряд дал в аренду PKL близко 1,3 га терену на Парковій Горі. Річно спілка платит за тото 6 тис. злотых. Власти самоуряду підкрисляют, же буджет не буде стратный, бо PKL плянуют там інвестицию за 20 мілийонів злотых. Ґміна має зыскати на збільшыню ся туристичного руху, як і вплывах з податків.

Знаный є уж термін премєры лемківской оперы «Голос»

Уж о два місяці, 24 листопада/новембра в Нацийональным Форум Музикы во Вроцлаві одбуде ся премєра лемківской оперы «Голос». То проєкт композиторкы Дариі Кузяк і першый в істориі синкретичный твір, котрый лучит в собі сучасну музику з лемківском народном музиком і електроніком. Опера оповідат про дві сестры, котры розділила доля, а туга пхат іх в свою страну. Сценічна презентация закладат участ двох вокалисток, лемківской капелі, оркєстры з дириґентом, танцюристів з лемківского ансамблю Пісні і Танця «Кычера» і сучасных. Разом в творіню лемківской оперы возме участ близко 60 осіб. Ансамбль Кычера на реазлизацию проєкту отримал дофінансуваня Міністра Культуры з проґраму Музика, не єст оно єднак выстарчаюче, жебы покрыти вшыткы кошты оперы. З той причыны композиторка і думкодавчыня оперы Дария Кузяк заложыла колекту на сайті zrzutka.pl. Цілю єст зобрати бракуючу квоту 48 тис. зл. Дотля повело ся зобрати близко половину потрібной сумы. Охочы підперти збірку найдут ю через вписаня на сайті zrzutka.pl «Premiera łemkowskiej opery „Hołos”. Першы пробы до премєры уж ся одбыли.