В Будапешті одбуде ся конференція на честь професора Удварі

Бібліотека Русинів Мадярьска імени професора Іштвана Удварі в Будапешті, котра тот рік святкує 20-ый юбілей свого основаня, орґанізує у своїх просторах в четверь 12-го септембра 2024-го року памятну конференцію на честь професора, по котрім має свою назву.

На конференції будуть брати участь Віктор Крамаренко – председа Вседержавного русиньского самосправованя, під котре бібліотека належыть, і Віра Ґіріц – посланкыня за Русинів у Парламенті Мадярьска.

На конференції участны будуть годны выслухати штири лекції. Ілдіка Поланскіне Надаш, ведуча Бібліотекы Русинів Мадярьска імени професора Іштвана Удварі, одпрезентує 20 років інштітуції і їй цінности. Анна Ланґне Бенедек Штумф буде бісідовати о основаню бібліотекы.

Русиньскый лінґвіста Михаіл Капраль буде в лекції занимати ся особов проф. Др. Іштвана Удварі, котрого быв колеґом на высокошкольскій русиністіці в Ніредьгазі. О етноґрафічных конспектах діятельности Іштвана Удварі буде бісідовати Дюла Віґ.

Славіста і педаґоґ Іштван Удварі (14. юла 1950 р. – 9. новембра 2005 р.) быв родаком із села Торньошпалца в Мадярьску. У 1975-ім році закінчів Універзіту Лайоша Кошута в Дебрецині, доктором філозофії быв од 1986-го року. Професуру здобыв у 1995-ім році.  Од року 1997 быв членом Мадярьской академії наук.

Удварі од 1982-го року выкладав російскый, україньскый і русиньскый язык на Высшій педаґоґічній школі в Ніредьгазі, де у 1992-ім році засновав Катедру україньской і русиньской філолоґії, яка фунґовала до року 2013, пізніше была обновлена лем україністіка.

Інтересовав ся аналізов русиньскых текстів, головно тых, котры односны суть ку періоду до 19-го столітя, і котры ся му подарило найти в мадярьскых архівах. Окрім іншого приготовив до друку дакілько томів рукописів русиньского історіка Антонія Годинкы, репрітны выдань букваря Мануіла Ольшавского, букваря Іоанна Куткы і много далшых. Так само працовав над языком і літературов Русинів Войводины.